ރާއްޖޭގައި އުފައްދާ ފުރަތަމަ އެންތޮލޮޖީ ފިލްމް "ހަތަރު ހަޅަ" އިގެ މަސައްކަތް ގާތްގަނޑަކަށް ނިމިފައިވާ ކަމަށާއި މަަަސައްކަތް ކުރަނީ ވީހާ ވެސް އަވަހަކަށް ފިލްމް ބެލުންތެރިންނާ ހަމައަށް ގެނެސް ދޭން ކަމަށް ޕްރޮޑަކްޝަން ޓީމުން ބުނެފި އެވެ.
މިއީ މުހައްމަދު ފުއާދު (ފޯޑް) ޕްރޮޑިއުސްކޮށް ހަތަރު ޑައިރެކްޓަރެއްގެ ކުރު ފިލްމްތަކެއް އެކުލެވޭ ގޮތަށް ގެނެސްދޭ ފިލްމެކެވެ.
މި ވައްތަރުގެ ފިލްމްތައް ދިވެހި ސިނަމާ އަށް އަދި އާވި ނަމަވެސް މިއީ ބޮލީވުޑްގައި ކާމިޔާބުވަމުން އަންނަ ސްޓައިލެކެވެ.
އެގޮތުން ހަތަރު ޑައިރެކްޓަރަކު ވެގެން އިންޑިއާގެ ސިނަމާ އަށް 100 އަހަރު ފުރުން ފާހަގަ ކުރުމާ ދިމާކޮށް މި އަހަރު ގެނެސް ދިން "ބޮމްބޭ ޓޯލްކީސް" އާއި ސަންޖޭ ގުޕްތާގެ "ދަސް ކަހާނިޔާ" އަދި ނިކިލް އަދްވާނީގެ "ސަލާމޭ އިޝްގް" ފަދަ ފިލްމްތަކަކީ ވަކިވަކި ސެގްމަންޓްތަކެއް ހިމެނޭ އެންތޮލޮޖީ ފިލްމްތަކެވެ.
"ހަތަރު ހަޅަ" ގައި ހިމެނޭ ހަތަރު ސެގްމަންޓް ޑައިރެކްޓްކޮށްފައި ވަނީ ރާއްޖޭގެ މަޝްހޫރު ހަތަރު ޑައިރެކްޓަރެކެވެ.
އެއީ "14 ވިލޭރޭ" އާއި "ލަވް ސްޓޯރީ" ފަދަ ފިލްމްތައް ބެލުންތެރިންނާ ހަމައަށް ގެނެސް ދީފައިވާ އަބްދުލް ފައްތާހު އާއި "ލޫދިފާ" ގެ ޑައިރެކްޓަރު މޫމިން ފުއާދުގެ އިތުރުން "ފަތިސްހަނދުވަރުގެ ފެށުން: 3ޑީ" ގެ ޑައިރެކްޓަރު އަލީ ޝިފާއު (ޗިއްޕެ) އާއި "އިނގިލީ" ގެ ޑައިރެކްޓަރު ރަވީ ފާރޫގެވެ.
"ހަތަރު ހަޅަ" އިގައި ހިމެނޭ ފައްތާހުގެ ސެގްމަންޓް "ދަރި-ފިރި" ގެ ތަރިންނަކީ މަރިޔަމް ޝަކީލާ އާއި އަލީ އާޒިމް (ދޮން އައްޔަ) އެވެ.
މޫމީންގެ ސެގްމަންޓް "ބައިވެރިޔާ" ގެ ތަރިންނަކީ ނިއުމާ މުހައްމަދާއި އަލަށް ތައާރަފްވާ އިބްރާހީމް އަލީ (އައްބާސް) އެވެ.
ޗިއްޕެގެ ސެގްމަންޓް "ފޮށި" ގެ ތަރިންނަކީ އިސްމާއީލް ރަޝީދު (ކޮޕީ އިއްސެ) އާއި ފާތުމަތު ފަރީލާ އެވެ.
މީގެ އިތުރުން ރަވީގެ ސެގްމަންޓް "ގާތިލް" ގެ ތަރިންނަކީ ފާތުމަތު ރިޝްފާ އާއި މަޖުދާ (މަޖޫ) އެވެ.
ފިލްމުގައި ހިމެނޭ ހަތަރު ސެގްމަންޓްގެ ތެރެއިން މޫމިންގެ ސެގްމަންޓް ފިޔަވައި އަނެއް ތިން ސެގްމަންޓްގެ ސްކްރީންޕްލޭ ތައްޔާރުކޮށް ދީފައި ވަނީ މަޝްހޫރު ސްކްރީން ރައިޓަރު އަހުމަދު މަހުދީ އެވެ. މޫމިންގެ ސްކްރިޕްޓަކީ އޭނާގެ އަމިއްލަ ސްކްރިޕްޓެކެވެ.
އަދި ހަތަރު ސެގްމަންޓްގެ ތެރެއިން ފައްތާހުގެ ސެގްމަންޓް ނޫން ހުރިހާ ސެގްމަންޓެއް ޝޫޓްކޮށްފައި ވަނީ މާލޭގަ އެވެ.
ފައްތާތުގެ "ދަރި-ފިރި" ޝޫޓްކޮށްފައި ވަނީ ރ. މީދޫގަ އެވެ.
"ހަތަރު ހަޅަ" އާ ބެހޭ ގޮތުން ފައްތާހާއި މޫމީން ވެސް ބުނީ މި ފިލްމަކީ ބެލުންތެރިންނަށް ކަމުދާނެ ގިނަ ރަހަތަކެއް އެކުލެވޭ މޮޅު ފިލްމަކަށް ވާނެ ކަމަށެވެ.
ފިލްމްގެ މަސައްކަތް ކުރިއަަށް 20 ދުވަހުގެ ތެރޭގައި އެއްކޮށް ނިންމާލެވުނު ނަމަވެސް، ފިލްމް ސިނަމާ އަށް ގެންނާނެ ތާރީހެއް އަދި އިއުލާނެއް ނުކުރެ އެވެ.