ރައީސް އަބްދުﷲ ޔާމީންގެ ސަރުކާރުގެ އެޓާނީ ޖެނެރަލް (އޭޖީ) ކަމަށް އައްޔަން ކުރައްވާފައި ވަނީ ސ. ފޭދު އަށް ނިސްބަތްވެވަޑައިގަންނަވާ ބޭފުޅެކެވެ.
އެއީ ފޭދޫ ސީނިއާހޭ އަލްއުސްތާޒް މުހައްމަދު އަނިލް އެވެ. މިއީ ޔާމީންގެ ކެބިނެޓްގައި ހިމެނިވަޑައިގަންނަވާ އައްޑޫގެ ދެވަނަ ބޭފުޅާ އެވެ.
އަނެއް ބޭފުޅަކީ ހެލްތު އެންޑް ޖެންޑަ މިނިސްޓަރު ސ. ހިތަދޫ މޫންލައިޓްވިލާ ޑރ. މަރިޔަމް ޝަކީލާ އެވެ.
ެއަނިލް އޭޖީގެ މަގާމަށް އައްޔަން ކުރެއްވުމަށް ފަހު ޔާމީން އަބްދުލް ވިދާޅުވީ ދައުލަތުގެ ބަންޑާރަ ނައިބު ކަމަށް ބޭފުޅަކު ޢައްޔަނު ކުރެއްވުމާއެކު، ކެބިނެޓްގެ މަޤާމުތަކަށް ހަމަޖެއްސެވުމަށް ނިންމަވާފައިވާ ހުރިހާ ބޭފުޅުން ހަމަޖައްސަވައި ނިމުނީކަން ފާހަގަ ކުރެއްވި އެވެ.
އަދި ކެބިނެޓްގެ ހުރިހާ ވަޒީރުން ވެސް ޤާނޫނު އަސާސީގައި ބަޔާންކޮށްފައިވާ އުޞޫލުތަކުގެ މަތިން އަދި ދިވެހި ރާއްޖޭގެ ޤާނޫނުތައް ދެމެހެއްޓެވުމަށް ކުރައްވަންޖެހޭ މަސައްކަތްޕުޅުތައް ކުރެއްވުމަށާއި، ދިވެހި ދައުލަތަށާއި، ރައީސުލްޖުމްހޫރިއްޔާއަށާއި، ރައީސުލްޖުމްހޫރިއްޔާގެ ނައިބަށް އިޚްލާޞްތެރިކަމާއި، ތެދުވެރިކަމާއި، އަމާނާތްތެރިކަމާ އެކީގައި މަސައްކަތްކޮށް ދެއްވުމަށް އެދިވަޑައިގެންނެވި އެވެ.