މި އަހަރުގެ ކުރީކޮޅު ބޮލުގެ ސާޖަރީއެއް ކުރުމަށް ފަހު އަދިވެސް މުޅިން ރަނގަޅު ނުވާތީ، އިތުރަށް ފަރުވާ ހޯދުމުގެ ގޮތުން ރިތިކް ރޯޝަންގެ ދެ ފިލްމެެއްގެ މަސައްކަތް މެދުކަނޑާލުމަށް ފަހު، ފަރުވާ އަށް ވަގުތު ހުސް ކުރާ ގޮތަށް ނިންމައިފި އެވެ.
ރިޕޯޓްތައް ބުނާ ގޮތުން ފަރުވާ އަށް ވަރަށް އަވަހަށް ރިތިކް އާއިލާ އެކު އެމެރިކާ އަށް ފުރާނެ އެވެ.
އޭނާގެ އެންމެ ފަހުގެ ފިލްމް "ކްރިޝް 3" ބޮޑެތި ކާމިޔާބީތަކެއް ހޯދަމުން އަންނަ އިރު، ކުރިއަށް ހުރި ފިލްމްތަކުގެ މަސައްކަތް ނުފެށި ލަސްވާތީ ރިތިކް ވަނީ ކަންބޮޑުވުން ވެސް ފާޅުކޮށްފަ އެވެ.
މީގެ ތެރެއިން އެއް ފިލްމަކީ މީގެ ކުރިން ބައެއް މަންޒަރުތައް ނެގުމަށް ފަހު، ރިތިކްގެ ސާޖަރީ އާ ގުޅިގެން މަސައްކަތް މެދުކަނޑާލި "ބޭންގް ބޭންގް" އެވެ.
އެއީ ސާޖިދް ނަދިއަދްވާލާ ޕްރޮޑިއުސްކޮށް، "އަންޖާނާ އަންޖާނީ" އާއި "ސަލާމް ނަމަސްތޭ" ފަދަ ފިލްތައް ޑައިރެކްޓްކޮށްފައިވާ ސިދާތު އާނަންދު ޑައިރެކްޓް ކުރާ ފިލްމެކެވެ. މި ފިލްމުގެ ބަތަލާއަކީ ކެޓްރީނާ ކެއިފެވެ.
އަނެއް ފިލްމަކީ ކަރަން ޖޯހަރުގެ ދަރްމާ އިން ޕްރޮޑިއުސްކޮށް، ރިތިކް ލީޑް ރޯލް ކުޅުނު "އަގުނީޕަތު" ގެ ޑައިރެކްޓަރު ކަރަން މަލްއުތުރާގެ "ޝުއްދީ" އެވެ.
މި ފިލްމުގެ ބަތަލާއަކީ ކަރީނާ ކަޕޫރެވެ.