ނަފްރަތު އުފެއްދުމޭ ކިޔައިގެން މި ކުޅެން އުޅޭ ކުޅިވަރު އެބައެނގޭ!: ޝެއިޚް ޒައިދު

ނަފްރަތު އުފެއްދުމޭ ކިޔައިގެން މި ކުޅެން އުޅޭ ކުޅިވަރު އެބައެނގޭ ކަމަށް މަޝްހޫރު ދީނީ ޢިލްމުވެރިޔާ ޝެއިޚް އަލީ ޒައިދު ވިދާޅުވެއްޖެއެވެ.

ޝެއިޚް ޒައިދު ކުރެއްވި ޓްވީޓްގައި އިތުރަށް ވިދާޅުވީ މުންކަރާތްތައް ހިންގާ ފަރާތްތަކަށް ފޭވާކޮށް ކިތަންމެ ޤާނޫނެއް ހެދިޔަސް މުންކަރާތް މަނާ ކުރުން ހުއްޓައެއް ނުލެވޭނެ ކަމަށެވެ.

"ނަފްރަތު އުފެއްދުމޭ ކިޔައިގެން މި ކުޅެން އުޅޭ ކުޅިވަރު އެބައެނގޭ!މުންކަރާތްތައް ހިންގާ ފަރާތްތަކަށް ފޭވާކޮށް ކިތަންމެ ޤާނޫނެއް ހެދިޔަސް މުންކަރާތް މަނާ ކުރުން ހުއްޓައެއް ނުލެވޭނެ! އެއީ އެއްވެސް ހާލެއްގައި ހަނިކުރެވޭނެ ކަމެއް ނޫން! ބިރު ނުދައްކާ އިސްލާމީ އުސޫލުތަކަށް އިހްތިރާމް ކުރައްވާ!" ޝެއިޚް ޒައިދު ވިދާޅުވިއެވެ.

ޝެއިޚް ޒައިދު މިހެން ވިދާޅުވި އިރު މުސްލިމަކަށް ކާފަރެއްގެ ތުހުމަތު ކުރުން ކުށެއްގެ ގޮތުގައި ކަނޑައެޅުމަށް، ޤާނޫނުލްޢުޤޫބާތު އަށް އިޞްލާޙު ގެނައުމުގެ ބިލު ރައްޔިތުންގެ މަޖިލީހަށް މިއަދު ވަނީ ހުށަހަޅާފައެވެ.

މި ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މެމްބަރު ހިސާން ހުސެއިން އެވެ.

މި ބިލުގެ ފުރަތަމަ ކިޔުން މިއަދު މަޖިލީހުގައި އިއްވާފައިވާއިރު، މި ބިލުގައި ވަނީ ނަފްރަތުގެ އަމަލު ހިންގުމުގެ ބަޔަށް އިތުރު ބައިތަކެއް އިތުރުކުރުމަށް އިސްލާހުތަކެއް ހުށަހަޅާފައެވެ.

އެ އިސްލާހުތަކުގެ ތެރޭގައި އާންމު ތަނެއްގައި ވަކި މީހަކީ އިސްލާމްދީނާ ހިލާފަށް އުޅޭ ނުވަތަަ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމާއި އިސްލާމީ އަގީދާއާ ގުޅުވައި މުޖުތަމައުގައި މީހަކާމެދު ނަފްރަތު އުފެއްދުން ކުށަކަށް ހެދުމަށް ވަނީ ހުށަހަޅާފައެވެ.

އަދި އާންމު ތަނެއްގައި މުސްލިމަކު ކާފަރުކުރުން ސިފަކުރުން ނުވަތަ ސިފަކުރުމުގައި ބައިވެރިވުމާއި، އާންމު ތަނެއްގައި މުސްލިމަކު ކާފަރެއްކަމަށް ތުހުމަތުކުރުން ވެސް ކުށަކަށް ހަދަން ވަނީ އިސްލާހު ހުށަހަޅާފައެވެ.

ބިލުގައިވާ ގޮތުން މި ކުށްތަކަކީ ޖުނަހްގެ އެއްވަނަ ދަރައިގެ ކުށްތަކެވެ. އެފަދަ ކުށެއްގެ އަސާސީ އަދަބަކީ އެއް އަހަރުގެ ޖަލު ހުކުމެކެވެ.