ކުރިއަށް އޮތް ލޯކަލް ކައުންސިލް އިންތިހާބުގައި، މިހާރު ވެސް ތަމްސީލް ކުރައްވަމުން ގެންދަވާ މަރަދޫ ދާއިރާ އަށް ކުރިމަތިލައްވާނެ ކަމަށް އެ ދާއިރާގެ ކައުންސިލަރު އަބްދުﷲ ތޮއްޔިބް (ޓޮމް) މިއަދު ވިދާޅުވެއްޖެ އެވެ.
އޭނާ ވިދާޅުވީ އެ ދާއިރާ އަށް ކުރިމަތިލާން އެމްޑީޕީގެ އިތުރުން އެ ޕާޓީ އާ އިދިކޮޅު ބައެއް ޕާޓީތަކުގެ ފަރާތުން ވެސް އޭނާ ކައިރީ އެދެމުން އަންނަ ކަމަށެވެ.
"ވަރަށް ގިނަ ދިމަދިމާލުން އަޅުގަނޑު ކުރިމަތިލާން ރެކްއެސްޓް ކުރަމުން އަންނާތީ އެގޮތަށް ކުރިއަށް ދާން ނިންމައިގެން މި ހުރީ. އިރާދަކުރެއްވިއްޔާ ގޮނޑި ކާމިޔާބް ކުރެވޭނެ،" ޓޮމް ވިދާޅުވި އެވެ.
އައްޑޫ ސިޓީ ކައުންސިލްގައި ހިމެނިވަޑައިގަންނަވާ ހަ ކައުންސިލަރުންގެ ތެރޭގައި، ޓޮމް ނޫނީ ޒިންމާދާރު ކަމާ އެކު މަސައްކަތް ކުރައްވާނެ ކައުންސިލަރަކު ނެތް ކަމަށް އައްޑޫގެ ވަރަށް ގިނަ ބަޔަކު ފާހަގަ ކުރެ އެވެ.
އަދި އޭނާއަކީ ދާއިރާއަށާއި އައްޑޫގެ ތަރައްގީގެ އެކި ކަންކަމުގައި އެހެން ކައުންސިލަރުންނާ ހިލާފަށް ވަރަށް ބޮޑަށް މަސައްކަތް ކުރައްވައި ކަންކަމުގައި އިސް ނަގައިގެން އުޅުއްވާ ބޭފުޅެއް ކަމަށް ގިނަ ބަޔަކު ފާހަގަ ކުރެ އެވެ.