މިއުޅެނީ ހަރުކަށި ފިކުރު ހުއްޓުވާކަށް ނޫން، ހާލަތުގެ ނާޖާއިޒް ފައިދާ ނަގަން: ޝެއިޚް ޒައިދު

މިއުޅެނީ ހަރުކަށި ފިކުރު ހުއްޓުވާކަށް ނޫން، ހާލަތުގެ ނާޖާއިޒް ފައިދާ ނަގަން ކަމަށް މަޝްހޫރު ދީނީ އިލްމުވެރިޔާ ޝެއިޚް އަލީ ޒައިދު ވިދާޅުވެއްޖެއެވެ.

ޝެއިޚް ޒައިދު ކުރެއްވި ޓްވީޓްގައި ވަނީ ލާދީނީ ޢަމަލްތަކާ ބަސްތަކަށް ޖާގަދީ، މިކަމަށް އިންކާރު ކުރާމީހުން ގޮޅިއަށް ފައްތަން އުޅޭ ކަމަށެވެ.

"މިއުޅެނީ ހަރުކަށި ފިކުރު ހުއްޓުވާކަށް ނޫން! އަސްލު މިއުޅެނީ ޙާލަތުގެ ޏަޖާއިޒް ފައިދާ ނަގައި ލާދީނީ ޢަމަލްތަކާ ބަސްތަކަށް ޖާގަދީ، މިކަމަށް އިންކާރު ކުރާމީހުން ގޮޅިއަށް ފައްތަން! އެއްވެސް އިޚްލާޞްތެރިކަމެއް ނެތް! ޤާނޫނަކުން އިސްލާމް ދީނުގެ އަސާސްތައް މުގުރައެއް ނުލެވޭނެ!" ޝެއިޚް ޒައިދު ވިދާޅުވިއެވެ.

މީގެ ކުރިން ޝެއިޚް ޒައިދު ކުރެއްވި ޓްވީޓެއްގައި ވަނީ ނަފްރަތު އުފެއްދުމޭ ކިޔައިގެން މި ކުޅެން އުޅޭ ކުޅިވަރު އެބައެނގޭ ކަމަށާއި، މުންކަރާތްތައް ހިންގާ ފަރާތްތަކަށް ފޭވާކޮށް ކިތަންމެ ޤާނޫނެއް ހެދިޔަސް މުންކަރާތް މަނާ ކުރުން ހުއްޓައެއް ނުލެވޭނެ ކަމަށް ވިދާޅުވެފައެވެ. އެއީ އެއްވެސް ހާލެއްގައި ހަނިކުރެވޭނެ ކަމެއް ނޫން ކަމަށާއި ބިރު ނުދައްކާ އިސްލާމީ އުސޫލުތަކަށް އިހްތިރާމް ކުރައްވުމަށް ވެސް ޝެއިޚް ޒައިދު ގޮވާލެއްވިއެވެ.

ޝެއިޚް ޒައިދު މިހެން ވިދާޅުވި އިރު މުސްލިމަކަށް ކާފަރެއްގެ ތުހުމަތު ކުރުން ކުށެއްގެ ގޮތުގައި ކަނޑައެޅުމަށް، ޤާނޫނުލްޢުޤޫބާތު އަށް އިޞްލާޙު ގެނައުމުގެ ބިލު ރައްޔިތުންގެ މަޖިލީހަށް މިއަދު ވަނީ ހުށަހަޅާފައެވެ.

މި ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މެމްބަރު ހިސާން ހުސެއިން އެވެ.

މި ބިލުގެ ފުރަތަމަ ކިޔުން މިއަދު މަޖިލީހުގައި އިއްވާފައިވާއިރު، މި ބިލުގައި ވަނީ ނަފްރަތުގެ އަމަލު ހިންގުމުގެ ބަޔަށް އިތުރު ބައިތަކެއް އިތުރުކުރުމަށް އިސްލާހުތަކެއް ހުށަހަޅާފައެވެ.

އެ އިސްލާހުތަކުގެ ތެރޭގައި އާންމު ތަނެއްގައި ވަކި މީހަކީ އިސްލާމްދީނާ ހިލާފަށް އުޅޭ ނުވަތަަ އިސްލާމްދީނާ ދެކޮޅު މީހެއް ކަމަށް ތުހުމަތު ކުރުމާއި އިސްލާމީ އަގީދާއާ ގުޅުވައި މުޖުތަމައުގައި މީހަކާމެދު ނަފްރަތު އުފެއްދުން ކުށަކަށް ހެދުމަށް ވަނީ ހުށަހަޅާފައެވެ.