ކޮވިޑަށް ފަރުވާ ދެމުން ދަނިކޮށް ރޭ ނިޔާވި އުމުރުން 10 އަހަރުގެ ކުއްޖާ ފަރުވާ ދިނުމަށް ހޮސްޕިޓަލަށް ގެންދިއުމަށް ބޮޑުތަނުން ލަސްވި ކަމަށް އާއިލާއިން ބުނެފިއެވެ.
އައިޖީއެމްއެޗް ހޮސްޕިޓަލްގެ އީއާރުގައި ފަރުވާ ދެމުން ދަނިކޮށް ރޭ ނިޔާވި ހދ. ކުޅުދުއްފުއްޓަށް ނިސްބަތްވާ ކުއްޖާގެ އާއިލާ މީހަކު ސޯޝަލް މީޑިއާގައި ހިއްސާ ކުރި ޕޯސްޓެއްގައި ބުނީ އެ ކުއްޖާގެ މަންމަ އާއި ބައްޕަ އަދި އެކުއްޖާ ކޮވިޑަށް ޕޮޒިޓިވް ކަމަށާއި، ކަރަންޓީނުވެގެންތިބީ ގޭގައި ކަމަށެވެ. އަދި ރޭ ކުއްޖާ ނޭވާލާން އުނދަގޫވެގެން އެޗްޕީއޭއަށް ގުޅިކަމަށާއި، ކުއްޖާ ބަލައި އެމްބިއުލެންސް އައީ ގުޅިތާ 2 ގަޑި އިރާއި 40 މިނިޓް ފަހުން ކަމަށެވެ.
އެ ކުއްޖާގެ ހާލު ދެރަވާން ފެށީ ރޭ 9 ޖަހާކަށް ހާއިރު ކަމަށް އެމީހާ ބުނެފައިވެއެވެ. އަދި ނޭފަތުން ލޭ އައުމުން އެކަން އެޗްޕީއޭއަށް އަންގައި އަވަހަށް އެމްބިއުލެންސް ފޮނުވައި ދިނުމަށް އާދޭސް ކުރިކަމަށް އެމީހާ ބުނެފައިވެއެވެ. ނަމަވެސް އެމްބިއުލެންސް އައީ ރޭ 11:40 ހާއިރުއެވެ.
އެކުއްޖާ ހޮސްޕިޓަލަށް ގެންދެވުނު އިރު ހާލު ވަރަށް ދެރަވުމުން ވަގުތުން އެކުއްޖާލީ ވެންޓިލޭޓަރަށެވެ. ކުއްޖާ ނިޔާވީ ވެންޓިލޭޓަރުގައި ފަރުވާދެމުން ދަނިކޮށް ރޭ 12:10 ހާއިރުއެވެ.
ކުއްޖާ ނިޔާވުމާއި ގުޅިގެން އާއިލާއަށް ހެލްތު މިނިސްޓަރ މުހައްމަދު ނަސީމް ގުޅުއްވައި މައާފު އެދުނު ކަމަށް އާއިލާއިން ވަނީ ބުނެފައެވެ. އަދި މި މައްސަލަ ބަލާނެކަމަށް ހެލްތު މިނިސްޓަރ އާއިލާއަށް ދަންނަވާފައިވާ ކަމަށް އެމީހާ ބުންޏެވެ.