އައްޑޫ ސިޓީ ކައުންސިލްގައި ހިތަދޫ މެދު ދާއިރާ ތަމްސީލް ކުރައްވާ ހުސައިން ހިލްމީ، ކުރިއަށް ލޯކަލް ކައުންސިލް އިންތިހާބުގައި ހަމަ އެ ދާއިރާ އަށް ދެވަނަ ދައުރަކަށް ކުރިމަތިލައްވަން ނިންމަވައިފި އެވެ.
އޭނާ ވިދާޅުވީ އެމްޑީޕީ ޓިކެޓްގައި މެދު ދާއިރާ އަށް ކުރިމަތިލައްވާ އިރު، ޕްރައިމެރީ ކާމިޔާބް ކުރެއްވޭނެ ކަމުގެ ޔަގީންކަން ވެސް ބޮޑު ކަމަށެވެ.
އެ ދާއިރާ އަށް އެމްޑީޕީގެ ޓިކެޓްގައި ވާދަ ކުރަން އިތުރު ދެ މީހަކު ވެސް ވަނީ ނިންމައިފަ އެވެ.
ހިލްމީ ވިދާޅުވީ އޭނާ ދެވަނަ ދައުރަކަށް ކުރިމަތިލައްވަނީ ގޮންޖެހުންތަކެއް ކުރިމަތިވި މިހާރުގެ ދައުރުން ލިބުނު ތަޖުރިބާގެ އަަލީގައި ކަމަށެވެ.
"މި ދައުރުގައި ކައުންސިލަށް އެކި ކަހަލަ ގޮންޖެހުންތައް ކުރިމަތިވެގެން ދިޔަ. އޭގެ ތެރޭގައި ކައުންސިލް އިންތިހާބްވިތާ އަހަރެއްވީ ތަނާ ރައީސް ނަަޝީދު ވެރިކަން ނިމުމާއި އޭގެ ފަހުން ދިމާވި އެކި ކަހަލަ މައްސަލަތައް ހިމެނޭ. އޭގެ ތެރޭގައި ބަޖެޓަކީ ވެސް ވަރަށް މުހިއްމު ދައުރެއް އަދާ ކުރި އެއްޗެއް،" ހިލްމީ ވިދާޅުވި އެވެ. "އަޅުގަނޑަށް ގަބޫލް ކުރެވެނީ މި ފަހަރު ލިބުނު ތަޖުރިބާގެ އަލީގައި ދެން އަންނަ ދައުރެއްގައި މާ ރަނގަޅަށް މަސައްކަތް ކުރެވޭނެ ކަމަށް."
އޭނާ އިތުރަށް ވިދާޅުވީ މި ދައުރުގައި ކައުންސިލަށް އެކަށީގެންވާ ގޮތަކަށް ރައްޔިތުންނާ މަޝްވަރާކޮށް، ކަންކަމުގައި ހިޔާލު ހޯދިފައި ނެތް ކަމަށް ގަބޫލް ކުރައްވާ ކަމަށެވެ.
އެކަމަކު ދެން ލިބޭ ދައުރެއްގައި އެކަން ރަނގަޅު ވާނެ ކަމުގެ ޔަގީންކަން އޭނާ ވަނީ ދެއްވައިފަ އެވެ.