އެމްބިއުލެންސް އައުން ލަސްވެ ފަރުވާ ނުދެވި 10 އަހަރުގެ ކުއްޖާ މަރުވި މައްސަލަ ކުއްލި މައްސަލައެއްގެ ގޮތުގައި ރައްޔިތުންގެ މަޖިލީހަށް ހުށަހަޅައިފިއެވެ.
ކުއްޖާގެ މަރުގެ މައްސަލަ އާއި ގުޅިގެން ކުއްލި މައްސަލަ މަޖްލިސްއަށް ހުށަހެޅުއްވީ މައްޗަންގޮޅި ދެކުނު ދާއިރާގެ މެމްބަރު އަހުމަދު ހައިތަމްއެވެ.
އެމްބިއުލެންސް އައުން ލަސްވުމާއި ގުޅިގެން ފަރުވާ ދިނުން ލަސްވެ މަރުވެފައިވަނީ ހދ. ކުޅުދުއްފުށީ ލާޖަހާގޭ މިކްޝާ 10އ. އެވެ. ކޮވިޑަށް ޕޮޒިޓިވްވެފައިވާ މިޝްކާގެ ހާލު ސީރިއަސްވާން ފެށީ ރޭ 9 ޖަހާކަށް ހާއިރުއެވެ. އެވަގުތުން ފެށިގެން އާއިލާއިން ކުއްޖާ ހޮސްޕިޓަލަށް ގެންދިއުމަށް އެމްބިއުލެންސަށް ގުޅިނަމަވެސް އެމްބިއުލެންސް އައީ ރޭ 11:40 ވީ ފަހުންނެވެ. އެ ކުއްޖާ އެމްބިއުލެންސްގެ އިންތިޒާރުގައި ބާއްވައިގެން ތިއްބާ ނޭފަތުން ލޭ އައިސް ވަނީ ހޭނެތިފައެވެ. މިޝްކާ މަރުވީ އައިޖީއެމްއެޗްގެ އިމަޖެންސީގައި ފަރުވާ ދެމުން ދަނިކޮށް ރޭ 12:10 ހާއިރުއެވެ.
ހައިތަމް ހުށަހެޅުއްވި މައްސަލާގައިވަނީ އެމްބިއުލެންސް ލަސްވެ ކުއްޖާއަށް ސިއްޙި ފަރުވާ ދިނުން ލަސްވި ސަބަބާއި، މި މައްސަލަ އާއި ގުޅިގެން ޒިއްމާވާން ޖެހޭ ފަރާތްތަކާއި ސުވާލު ކުރުމުގެ އިތުރުން މާލޭގެ އާބާދީ އާއި އެއްވަރަށް ހިދްމަތް ދިނުމަށް ސިއްހީ ސާމާން ހުރިތޯ ބަލަން ހުށަހަޅާފައެވެ.
މިޝްކާގެ މަރުގެ މައްސަލަ ހިއުމަން ރައިޓްސް ކަމިޝަނުން މިހާރު ވަނީ ބަލަން ފަށާފައެވެ.