ގދ. ތިނަދޫގައި ބާރު ސްޕީޑެއްގައި ދުއްވާފައި ދިޔަ ކާރެއް ކޮންޓްރޯލް ނުވެ އެރަށު އުތުރު ފަރާތު ހިއްކި ސަރަހައްދުގެ ރިވެޓްމެންޓް ހިލަތަކުގެ މަތިން މޫދަށް ވެއްޓި، އެކަކުގެ ހާލު ސީރިއަސްވެއްޖެއެވެ.
މިއަދު މެންދުރު ހިނގި މި ހާދިސާގައި ކާރުގައި ތިން މީހުން ތިބިކަމަށް މައުލޫމާތުލިބެއެވެ.
ތިނަދޫގައި ހުންނަ ޑރ. އަބްދުއް ސަމަދު މެމޯރިއަލް ހޮސްޕިޓަލްގެ މެނޭޖަރ އަހުމަދު ސައީދު އާއި ހަވާލީދީ "ގާފު" ނޫހުން ރިޕޯޓުކޮށްފައިވާ ގޮތުގައި މި އެކްސިޑެންޓުގައި އަނިޔާވި އެކަކަށް ފަރުވާ ދެމުންދަނީ ހޮސްޕިޓަލްގެ އައިސީޔޫގައެވެ. އޭނާއަށް ލިބިފައިވާ އަނިޔާގެ ތަފްސީލެއް ލިބިފައި ނުވެއެވެ.
ތިނަދޫން ވާހަކަ ދެއްކި މީހަކު ބުނީ ކާރު ކޮންޓްރޯލުން ނެޓި ހިލަތަކުގެ މަތިން މޫދަށް ވެއްޓިފައިވާ އިރު ކާރު ނެގުމުގެ މަސައްކަތް ކުރަމުން އަންނަ ކަމަށެވެ.
މި ހާދިސާ އާއި ގުޅޭގޮތުން އަދި ފުލުހުން އެއްވެސް ވާހަކައެއް ދައްކާފައި ނުވެއެވެ.