އިންޑިއާގެ ބޮކްސް އޮފީހުގައި މިހާރު ރަސްކަން ކުރަމުން އަންނަ ސަންޖޭ ލީލާ ބަންސާލީގެ "ރާމް-ލީލާ" ގައި ދައްކުވައި ދީފައިވާ ކުޅަދާނަ ހުނަރާއި ރީތި، ވަރުގަދަ ހަށިގަަނޑުގެ ސަބަބުން އެ ފިލްމްގެ ބަތަލު ރަންވީރު ސިންގަށް ގިނަ އަދަދެއްގެ މެސެޖްތަކެެއް އޮހެން ފަށައިފި އެވެ.
ހާއްސަކޮށް ޒުވާން އަންހެން ކުދިންގެ އެވެ. އެކިއެކި ޝުއޫރުތައް ފާޅުކޮށްފައިވާ މެސެޖްތައް ސޯޝަލް މީޑިއާ މެދުވެރިކޮށް ރަންވީރަށް ލިބެމުން ދާތީ އޭނާ ހުރީ ވަރަށް އުފަލުންނެވެ.
އޭގެ ތެރޭގައި ގިނަ އަދަދެއްގެ ލޯބީގެ މެސެޖްތަކާއި "ސެކްސީ" މެސެޖްތައް ވެސް ހިމެނެ އެވެ.
"ރާމް-ލީލާ" ގެ ވަރަށް ގިނަ މަންޒަރުތަކެއްގައި ރަންވީރު އޭނާގެ ކަސްރަތީ ހަށިގަނޑު އެއްވެސް ޖެހިލުމެއް ނެތި ހާމަކޮށްފައިވާތީ، އެ ހަށިގަނޑު ބަލާލަން ވެސް އަންހެން ކުދިން ވަނީ ހާއްސަ ޝައުގުވެރި ކަމެއް ދީފަ އެވެ.
އެގޮތުން ސިނަމާތަކަށް އެއް ފަހަރަށް ވުރެ ގިނައިން ގޮސް "ރާމް-ލީލާ" ޒުވާން ވަރަށް ގިނަ އަންހެން ކުދިން ވަނީ މި ފިލްމް ބަލައިފަ އެވެ.
އަނެއްކޮޅު ރަންވީރުގެ ނެށުމުގެ މޮޅު ހުނަރަށް ވެސް ގިނަ ބައެއްގެ ތައުރީފް އަންނަނީ އޮހެމުންނެވެ.
"ރޯމިއޯ އެންޑް ޖޫލިއަޓް" ގެ ވާހަކަ އަށް ބިނާކޮށް ހަދާފައިވާ "ރާމް-ލީލާ" އަށް ކްރިޓިކުން ވެސް ވަނީ ވަރަށް ބޮޑަށް ތައުރީފުކޮށްފަ އެވެ.
އެގޮތުން ބަންސާލީގެ ޑައިރެކްޝަނާ އެކު ރަންވީރާއި ދީޕިކާ ޕަދްކޯންގެ މޮޅު އެކްޓިން އަށް ކްރިޓިކުން ވަނީ ހިފެހެއްޓުމެއް ނެތް ތައުރީފްގެ ބަަސްތައް އޮއްސައިފަ އެވެ.
މި ފިލްމް ތިން ފަހަރަށް އަމީތާބް ބައްޗަން ވެސް ބަލާފައިވާ އިރު، ރަންވީރާއި ދީޕިކާ އަދި "ރާމް-ލީލާ" ގައި މުހިއްމު ރޯލެއް ކުޅުނު ރިޗާ ޗައްދާގެ ހުނަރަށް ވެސް އަމީތާބް ވަނީ އެ ތަރިންނަށް ފޯނުން ގުޅައި ތައުރީފްކޮށްފަ އެވެ.