މަސްތުވާތަކެއްޗާއި އެ ނޫން ބާވަތްތަކުގެ ކުށްތައް މަދު ކުރަން މުޅި ރާއްޖޭގައި ހިންގާ މަަަސަައްކަތުގެ ދަށުން އައްޑޫގެ ރަށްރަށުގައި ސީސީޓީވީ ކެމެރާތައް ބަހައްޓައި، ކުއްތާތައް ގެންގުޅެން ފަށާނެ ކަމަށް އާ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
ރޭ ދިޓީވީގެ "ހަބަރު ތެރެއިން" ޕްރޮގްރާމްގައި ވާހަކަ ދައްކަވަމުން އުމަރު ވިދާޅުވީ މާލެެއެކޭ އެއްގޮތަށް އާބާދީ ބޮޑެތި ސަރަހައްދުތަކުން ކުށް މަދު ކުރަން ބޮޑެތި މަސައްކަތްތަކެއް ކުރާނެ ކަމަށެވެ.
އެގޮތުން ރަށްރަށުގެ މަގުތަކުގައި ސީސީޓީވީ ކެމެރާތައް ހަރުކޮށް، މަސްތުވާތަކެތިު ވަންނަ ދޮރުތައް ބަންދު ކުރަން ރަށްރަށުގެ ކަނޑު ބަނދަރުތަކާއި ވައިގެ ބަނދރުތަކުގައި ކުއްތާތައް ބޭނުން ކުރާނެ ކަމަށް އޭނާ ވިދާޅުވި އެވެ.
އުމަރު ވިދާޅުވީ މަސްތުވާތަކެތީގެ މައްސަލަތައް ހައްލު ކުރަން ކުއްތާއަކީ ވަރަށް ބޮޑު ދައުރެއް އަދާ ކުރާނެ ވަސީލަތަކަށް ވާތީ، ކުއްތާތައް ރާއްޖޭގައި ގެންގުޅެވޭނެ ގޮތްތަކެއް އިސްލާމިކް މިނިސްޓްރީގެ ލަފާގެ ދަށުން ހޯއްދަވާނެ ކަމަށެވެ.