މީގެ 32 އަހަރު ކުރިން "ލަވް ސްޓޯރީ" ގެ ނަމުގައި ވަަރަށް ކާމިޔާބް، ހިތްގައިމު ފިލްމެއް ގެނެސް ދިން ރާހުލް ރަވައިލް އަނެއްކާ ވެސް ހަމަ އެ ނަމުގައި ފިލްމެއް ގެނެސް ދޭން ނިންމައިފި އެވެ.
ފަހުން ސަނީ ޑިއޯލްގެ "ބޭތާބް" އާއި ކާޖޮލްގެ "ބޭހުދީ" ފަދަ ފިލްމްތައް ވެސް ބެލުންތެރިންނާ ހަމައަށް ގެނެސް ދިން އުމުރުން މިހާރު 63 އަހަރުގެ ޑައިރެކްޓަރު ބުނީ އަންނަ އަހަރު މަސައްކަތް ފަށާ "ލަވް ސްޓޯރީ" އަކީ ކުރީގެ ފިލްމާ އެއްވެސް ގުޅުމެއް ނެތް ފިލްމެއް ކަމަށެވެ.
ކުރީގެ "ލަވް ސްޓޯރީ" ގައި ލީޑް ރޯލް ކުޅެފައި ވަނީ ކުމާރް ގޯރަވް އާއި ވިޖޭތާ އެވެ. މިއީ ދިވެހިންގެ ތެރޭގައި މިހާރު ވެސް ވަރަށް މަގުބޫލް ފިލްމެކެވެ. ހާއްސަކޮށް ފިލްމްގެ ލަވަތައް މިހާރު ވެސް ދިވެހިންގެ ތެރޭގައި ވަރަށް މަޝްހޫރެވެ.
ރާހުލް ބުނީ އޭނާގެ އާ "ލަވް ސްޓޯރީ" ގައި ހިމެނޭނީ ދެ ބަތަލުންނާއި ދެ ބަތަލާއިން ކަމަށެވެ. އަދި އެއީ މުޅިން އާ ތަރިންނަށް ވާނެ ކަމަށް ވެސް ރާހުލް ބުންޏެވެ.
"މިއީ ކުރީގެ ފިލްމާ އެއްވެސް ގުޅުމެއް ހުރި ފިލްެމެއް ނޫން. އެކަމަކު އެކަހަލަ އަސަރު ގަދަ ހިތްގައިމު ފިލްމަކަށް މި ފިލްމު ހެދޭތޯ ބަލާނަން،" އޭނާ ބުންޏެވެ.
ކުރީގެ "ލަވް ސްޓޯރީ" ގެ މިއުޒިކް ތައްޔާރުކޮށް ދިނީ މަރުހޫމް އާރްޑީ ބަރްމަން އެވެ.
"ކުރީ ފިލްމްގެ ލަވަތަކުގެ ޖާދޫ މި ފަހަރު ވެސް ގެންނަން ބޭނުން. އެކަމަކު އެކަން ކުރެވޭނެތޯ ނުވަތަ ނޫންތޯ ބުނާކަށް އަދި ނޭނގޭ. އެކަމަކު ވަރަށް ބޮޑަށް މަސައްކަތް ކުރާނަން." ރާހުލް ބުންޏެވެ. "އަދި އާ ފިލްމުގެ މިއުޒިކް ތައްޔާރު ކުރާނެ މީހަކު ވެސް ނުނިންމަން."
ރާހުލް އެންމެ ފަހުން ޑައިރެކްޓް ކުރި ފިލްމަކީ 2007 ވަނަ އަހަރު ގެނެސް ދިން "ބުއްޑާ މަރުގަޔާ" އެވެ.