މީދޫގައި އުޅެމުންދާ ދޮންދީނި މަރައި ދޮންދީނީގެ ނަސްލަށް ގެއްލުން ދެމުންދާތީ އެރަށުގައި އުޅޭ ކާޅު ބަޑި ޖަހައި މަރަން ފަށައިފިއެވެ.
މީދޫ އޮފީހުން މިއަދު ނެރުނު ބަޔާނެއްގައި ބުނީ މިއަދު ހެނދުނު 6 އިން ފެށިގެން އެމްއެންޑީއެފްގެ ސިފައިން ބަޑި ޖަހައި ކާޅު މަރަމުން އަންނަ ކަމަށެވެ. އަދި މިހާތަނަށް ބަޑި ޖަހައި މެރިފައިވަނީ އެންމެ ކާޅެއް ކަމަށް މީދޫ އޮފީހުން ބުނެއެވެ. އަދި އިތުރު ކާޅެއް މީދޫން ފެނިއްޖެނަމަ 9955334 އަދި 7789041 ނަންބަރު ފޯނަށް ގުޅައި މައުލޫމާތު ދިނުމަށް ވަނީ އެދިފައެވެ.
ފަހަކަށް އައިސް އައްޑޫގެ ރަށްތަކުން މަދު މަދުން ކާޅު ފެންނަމުން އަންނަ އިރު ކާޅުތައް އަންނަނީ ދޮންދީނިތަކުގެ ނަސްލަށް ގެއްލުން ދެމުންނެވެ. އެގޮތުން ކުދި ދޮންދީނިތައް މަރައިގެން ކެއުމުގެ އިތުރުން ދޮންދީނި ހާލިތަކަށް ކާޅުތައް ދަނީ ހަމަލާދެމުންނެވެ.
އައްޑޫ އަކީ ރާއްޖޭގެ ރަށްތަކުގެ ތެރެއިން ކާޅު އެއްގޮތަކަށްވެސް އުޅޭ ތަނެއް ނޫނެވެ. ނަމަވެސް ދޭތެރެދޭތެރެއިން ބައެއް މީހުން އައްޑޫއަށް ކާޅު ގެނެސް ގެންގުޅެއެވެ. އަދި އެގޮތަށް ގެންނަ ކާޅުތަކުގެ ތެރެއިން މިހާރު ފެންނަނީ ކާޅުތައް އިތުރުވެ ދޮންދީނިތަކަށް ހަމަލާ ދެމުންދާތަނެވެ. މި ކަމާއި ގުޅިގެން އައްޑޫގެ ރައްޔިތުން ވަނީ ކާޅު މެރުމަށް ގޮވާލާފައެވެ.
ދޮންދީނިއަކީ ސަރުކާރުން ހިމާޔަތްކޮށްފައިވާ ދޫންޏެކެވެ.