ރިލީޒް ކުރިތާ 10 ދުވަހުގެ ތެރޭގައި ސަންޖޭ ލީލާ ބަންސާލީގެ "ރާމް-ލީލާ" ބޮކްސް އޮފީހުގައި ރަނގަޅު ވިޔަފާރިއެއްކޮށް، ބެލުންތެރިންހެ ހިތްތައް ފަތަހަކޮށްގެން "100 ކްރޯޑް ކުލަބް" އިން ޖާގަ ހޯދައިފި އެވެ.
މި މަހުގެ 15 ވަނަ ދުވަހު ރިލީޒް ކުރި މި ފިލްމަކީ ރަންވީރު ސިންގާއި ދީޕިކާ ޕަދްކޯން ލީޑް ރޯލް ކުޅެފައިވާ ފިލްމެކެވެ. ފިލްމް ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ އިރު، ކްރިޓިކުންގެ ތައުރީފް ވެސް "ރާމް-ލީލާ" އަށް ވަނީ އޮހިފަ އެވެ.
މަޝްހޫރު ފިލްމް ކްރިޓިކުން ކަމަށްވާ ތަރަން އަދާޝް އާއި ކޯމަލް ނަހަތާ ބުނެފައި ވަނީ "ރާމް-ލީލާ" އަކީ ބަންސާލީ މިހާތަނަށް ގެނެސް ދިން އެންމެ ވަރުގަދަ ފިލްމް ކަމަށެވެ. އަދި މިއީ "މާސްޓަޕީސް" އެއްގެ ގޮތުގައި އ ެމީހުން ވަނީ ސިފަކޮށްފަ އެވެ.
ޝޭކްސްޕިއާގެ "ރޯމިއޯ އެންޑް ޖޫލިއަޓް" ގެ ގުޖުރާތީ ވާޝަންގެ ގޮތުގައި ގެނެސް ދިން "ރާމް-ލީލާ" އަކީ ރަންވީރުގެ ފުރަތަމަ "100 ކްރޯޑް" ފިލްމެވެ. އަދި މިއީ ބަންސާލީގެ ފިލްމަކަށް ވެސް އެ ޝަރަފް ލިބުނު ފުރަތަމަ ފަހަރެވެ.
އެހެން ނަމަވެސް މިއީ އެ ނަމްބަރު ފަހަނައަޅައި ދީޕިކާ މި އަހަރު ދަތުރު ކުރި ހަތަރު ވަނަ ފިލްމެވެ.
މި އަހަރު ރިލީޒްވި އޭނާގެ އަނެއް ތިން ފިލްމް ކަމަށްވާ "ރޭސް 2" އާއި "ޔެ ޖަވާނީ ހޭ ދީވާނީ" އަދި "ޗެންނައި އެކްސްޕްރެސް" އަކީ ބޮކްސް އޮފީހުގައި އާ ރެކޯޑްތަކެއް ހެދި ފިލްމްތަކެވެ.
މި ރެކޯޑާ އެކު ދީޕިކާ ވެފައި ވަނީ ބޮލީވުޑްގައި މިހާރު ހުރި އެންމެ ކާމިޔާބް ބަތަލާއަށެވެ.