ކުރިއަށް އޮތް ލޯކަލް ކައުންސިލް އިންތިހާބުގައި އައްޑޫ ސިޓީ ކައުންސިލްގައި މިހާރު ވެސް ހިތަދޫ އުތުރު ދާއިރާ ތަމްސީލް ކުރައްވާ އަދި މޭޔަރުގެ މަގާމުގއި ވެސް ހުންނެވި އަބްދުﷲ ސޯދިގް (ސޯބެ) މި ފަހަރު ވެސް ހަމަ އެ ދާއިރާ އަށް އެމްޑީޕީ ޓިކެޓްގައި ކުރިމަތިލައްވަން ނިންމަވައިފި އެވެ.
ސޯބެ ކައުންސިލަށް ހޮވާފައި ވަނީ، ކައުންސިލް އުފެއްދުމުގެ ކުރިން ކުރީގެ ރައީސް މުހައްމަދު ނަޝީދުގެ ސަރުކާރުގައި އައްޑޫގެ އަތޮޅު ކައުންސިލަރެއްގެ މަގާމު ވެސް ފުރުއްވަމުން ގެންދަވަނިކޮށެވެ.
އޭގެ ކުރިން އޭނާއަކީ ކުރީގެ ސަދަން ސެކަންޑްރީ ސްކޫލް އަދި މިހާރުގެ ޝަރަފުއްދީން ސްކޫލްގައި ގިނަ ދުވަސްތަކެއް ވަންދެން ޓީޗަރެއްގެ މގާމު އަދާ ކުރެއްވި ބޭފުޅެކެވެ. އަދި ފަހުން ހިތަދޫގައި ހުރި ކޮމްޕްރިހެންސިވް ސްކޫލްގެ ހިންގެވުމުގައި ވެސް ސޯބެ އިސް ދައުރެއް އަދާ ކުރައްވާފައިވެ އެވެ.
ސޯބެ ކައުންސިލްގެ މޭޔަރުކަން އަދާ ކުރައްވަމުން ގެންދަވާ އިރު، ކައުންސިލުން މިހާތަނަށް ނިންމާފައިވާ އެކިއެކި ނިންމުންތަކާ ގުޅިގެން ވަރަށް ބޮޑެތި ފާޑު ކިއުންތަކެއް އަމާޒުވެފައިވެ އެވެ.