ޤައުމީ ޔުނިވަރސިޓީގެ ހިތަދޫ ކެމްޕަހުގައި އޯގަސްޓު އިންޓޭކުގެ ކޯސްތަކަށް ވަނުމުގެ ފުރުޞަތު ހުޅުވާލައިފިއެވެ
ހިތަދޫ ކެމްޕަހުން ބުނީ އޮގަސްޓު އިންޓޭކަށް ހުޅުވާލާފައިވާ ފުރުސަތުތަކަކީ ދެކުނުގެ އަތޮޅުތަކުގެ އެކި ދާއިރާއިން މީހުން ބިނާކުރުމުގެ މަޤްޞަދުގައި ހުޅުވާލި ކޯސްތަކެއް ކަމަށެވެ. އެގޮތުން އެކި ދާއިރާތަކަކުން ސެޓްފިކެޓް ލެވެލް، އިން ފެށިގެން ޑިގްރީ އަދި މާސްޓާރސް ފެންވަރުގެ ކޯސްތަކަށް ވަނީ އިއުލާން ކޮށްފައެވެ.
އެގޮތުން ބެޗްލަރ އޮފް ޓީޗިން ސެކަންޑްރީ (އެކައުންޓިންގ/ ބިޒްނަސް ސްޓަޑީޒް) އަދި (އިކޮނޮމިކްސް/ޓްރެވެލް އެންޑް ޓުރިޒަމް) ހުޅުވާލެވިފައިވެއެވެ. މިކޯހުގެ ޝަރުތަކީ އޭލެވެލް ދެ ފާސް (ޚާއްސަވާ މާއްދާ ހިމަނައިގެން) އަދި އޯލެވެލް ހަތަރު ފާސް (އިނގޭރި ހިމަނައިގެން)ނެވެ.
ނަރުސްކަމުގެ ދާއިރާއިން އެޑްވާންސް ސެޓްފިކެޓް އިން ނާސިންގ، ޑިޕްލޮމާ އިން ނާސިންގ އާއި ބެޗްލަރ އޮފް ނާސިންގ ކޯސް ވަނީ އިއުލާންކުރެވިފައެވެ. މީގެ ތެރެއިން އެޑްވާންސް ކޯހަށް އޯލެވެލް ތިން ފާހާއިއެކު ވަދެވޭނެއެވެ. އެއް އަހަރު ދުވަހުގެ މިކޯސް ފުރިހަމަ ކުރުމަށްފަހު ޑިޕްލޮމާ ކޯހަށް ވަނުމުގެ ފުރުޞަތު ލިބިގެންދާނެއެވެ.
ދީނީ އަދި އަރަބި އިލްމް އުނގެނެން ޝައުޤުވެރިވާ ފަރާތްތަކަށް އަރަބި ބަހުގެ ސެޓްފިކެޓް 3 އަދި ބެޗްލާންސް އޮފް އިސްލާމިކް ސްޓަޑީޒް ކޯސް (ދިވެހި މީޑިއަމް) ވަނީ ހުޅުވާލެވިފައެވެ. އޭލްވެލްއިން 3 މާއްދާއިން (އިސްލާމް ހިމެނޭ ގޮތަށް) ފާސްވެފައިވާނަމަ ބެޗްލަރ ކޯހަށް ވަނުމުގެ ޝަރުތު ހަމަވާނެއެވެ. އެޑްވާންސް ސެޓްފިކެޓް އިން އިސްލާމިކް ކޯސް ނިންމާފައިވާ ފަރާތްތަކަށްވެސް ބެޗްލަރއިން އިސްލާމިކް ސްޓަޑީޒް ކޯހަށް ވަނުމުގެ ފުރުސަތު ލިބިގެންދާނެއެވެ.
ޝަރީއަތާއި ޤާނޫނީ ދާއިރާއިން އެޑްވާންސް ސެޓްފިކެޓް އިން ޝަރީއާ އެންޑް ލޯ އަދި ބެޗްލަރ އޮފް ޝަރީއާ އެންޑް ލޯ ކޯސް ވަނީ ހުޅުވާލެވިފައެވެ. މިއީ ޤާނޫނީ ދާއިރާއިން ކުރިއަށްދާން ބޭނުންވާ ފަރާތްތަކަށް ހުޅުވާލެވިފައިވާ ފުރުސަތެކެވެ. އެޑްވާންސް ސެޓިފިކެޓް ކޯހަށް އޯލެވެލް 03 ފާހާއި އެކު އަދި ޑިގްރީ ކޯހަށް އޭލެވެލް 02 ފާހާއި އެކު ޝަރުތު ހަމަވާނެއެވެ. އަދިހަމަ މިދާއިރާއިން އެޑްވާންސް ލެވެލް ފުރިހަމަކޮށްފައިވާ ފަރާތްތަކަށް ޑިގްރީ ކޯހަށް ވަނުމުގެ ފުރުސަތުވެސް ލިބިގެންދާނެއެވެ.
ސިއްޙީ ދައިރާގެ ކޯސްތަކުގެ ތެރެއިން ބެޗްލަރ އޮފް ހެލްތް ސާވިސް މެނޭޖެމެންޓް ކޯހަކީ ހިތަދޫ ކެމްޕަހުގައި މުޅިން އަލަށް ހިންގުމަށް އިޢުލާން ކުރެވިފައިވާ ކޯހެކެވެ. ސިއްޙީ ދާއިރާގެ ހިންގުމުގެ އުކުޅުތައް އުނގަންނައިދޭ މިކޯހަށް ވަނުމުގެ ޝަރުތަކީ އޭލެވެލް ދެ ފާސް އަދި އޯލެވެލް ހަތަރު ފާސް (އިނގޭރި ހިމަނައިގެން) އެވެ.
ވިޔަފާރި އާއި ހިންގުމުގެ ދާއިރާއިން އިޢުލާން ކޮށްފައިވާ ކޯސްތަކުގެ ތެރޭގައި ބެޗްލަރ އޮފް އެކައުންޓިންގ އެންޑް ފައިނޭންސް އަދި ބެޗްލަރ އޮފް މާކެޓިންގ ކޯސް ހިމެނެއެވެ. މި ދެކޯހަކީވެސް ހިންގުމުގެ ދާއިރާއަށް ހާއްސަ ކުރެވިގެން ފަރުމާ ކުރެވިފައިވާ ކޯސްތަކެކެވެ. މިކޯސްތަކަށް އޭލެވެލްގެ 02 މާއްދާއިން ޝަރުތުހަމަވެގެންދާއިރު މިދާއިރާއިން އެޑްވާންސް ސެޓްފިކެޓް ހާސިލްކޮށްފައިވާ ފަރާތްތަކަށްވެސް ފުރުސަތު ލިބިގެންދާނެއެވެ.
އޯގަސްޓް އިންޓޭކަށް ހުޅުވާލެވިފައިވާ ކޯސްތަކަށް ވަނުމުގެ ފަހު ތާރީޚަކީ 5 އޯގަސްޓެވެ. ޤައުމީ ޔުނިވަރސިޓީގެ ކޯސްތަކުގެ ތެރެއިން ހުރިހައި ދާއިރާއަކުންވެސް އިޢުލާން ކުރެވިފައިވާ ޑިގްރީ ކޯސްތަކަށް އެއްވެސް ފީއެއް ދައްކަވަން ޖެހިވަޑައިނުގަންނަވާނެއެވެ. ޑިގްރީ ކޯސްތަކަކީ މުޅިން ހިލޭ ހިންގޭ ކޯސްތަކެކެވެ. ކޯސްތަކަށް ފޯމް ހުށަހެޅޭނީ އޮންލައިން ޕޯޓަލް mnu.edu.mv/apply މެދުވެރިކޮށެވެ. ކޯސްތަކާއި ބެހޭ އިތުރު މައުލޫމާތު https://courses.mnu.edu.mv/
މިލިންކުން ނުވަތަ 3345242 އިން ލިބިވަޑައިގަންނަވާނެއެވެ.
ހިތަދޫ ކެމްޕަހުން މައުލޫމާތު ދިން ގޮތުގައި މަތީ ސާނަވީއަށް ދިވެހިން ބިނާ ކުރުމަކީ ޤައުމީ ޔުނވަރސިޓީގެ އަމާޒަކަށް ވެފައިވާއިރު މިދާއިރާއިން ދިވެހިބިނާކުރުމަށް މި ފަހަރު ހުޅުވާލި ފުރުސަތު ތަކަކީ ހުރިހާ ފަރާތްތަކަށް ވެސް ވަރަށް ބޭނުންތެރި ކޯސްތަކެއް ކަމަށެވެ.