ކެންސަރު ބައްޔަށް ފަރުވާ ހޯއްދަވަމުން ދަނިކޮށް ރޭ އަވަހާރަވި ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު އަހުމަދު މުހައްމަދު ސޯލިހު (އަހުމަދުބެ) އަކީ އެމްޑީޕީގެ ވަރުގަދަ އެކްޓިވިސްޓެއްކަމަށް އެމްޑީޕީގެ ރައީސް އަދި މަޖްލިސްގެ ރައިސް މުހައްމަދު ނަޝީދު ވިދާޅުވެއްޖެއެވެ.
އަހުމަދުބެ އަވަހާރަވުމާއި ގުޅިގެން ނަޝީދު ކުރެއްވި ޓްވީޓެއްގައި ވިދާޅުވީ އަހުމަދުބެ އަކީ، ބުއްދިވެރި އޯގާތެރި އަދި މަޖާ މިޒާޖެއްގެ ގާތް މީހެއް ކަމަށެވެ. އަހުމަދުބެ އަޑުނާހާ އެމްޑީޕީގެ އެންމެ ޖަލްސާއެއް ނެތޭ ބުންޏަސް ދޮގަކަށް ނުވާނެކަމަށް ނަޝީދު ވިދާޅުވިއެވެ.
Hinnavaru Nooraaneege Ahmadbe akee buhdhiveri,ogaatheri,majaa mizaajehge alhuganduge gaiy meeheh.MDP ge varugadha activisteh.Ahmadbe adunaaha MDP evves jalsaa eh nuvaaney bunyas dhogakah nuvaane.Maiy Allah marhoom ah suvaruge minvaru kuravva,aailaa ah kehtherikan dhevvashi.Aameen
— Mohamed Nasheed (@MohamedNasheed) June 21, 2021
ރައީސް އިބްރާހިމް މުހައްމަދު ސޯލިހުގެ އެންމެ އަރިސް ބޭފުޅެއްކަމުގައިވާ ނަޝީދު ވަނީ އަހުމަދުބެ އަވަހާރަވުމާއި ގުޅިގެން އާއިލާއަށް ތައުޒިޔާ ވިދާޅުވެފައެވެ. އަދި އަހުމަދުބެގެ ފުރާނައަށް ސުވަރުގޭގެ މަތިވެރި ނިއުމަތް ދެއްވުން އެދި ނަޝީދުވަނީ އެދިވަޑައިގެންފައެވެ.
އަހުމަދުބެ އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ދަނިކޮށް ރޭ ދުބާއީގައެވެ. އަހުމަދުބެގެ ޖަނާޒާއަށް މިއަދު ހެނދުނު ރައީސް އިބްރާހިމް މުހައްމަދު ސޯލިހު އާއި އާއިލާގެ ބޭފުޅުން ވަނީ ދުބާއީއަށް ފުރާވަޑައިގެންފައެވެ.