މަސްތުވާތަކެތި ޓްރެފިކް ކުރިކަމަށް ތުހުމަތުކޮށް ދައުވާ އުފުލާފައިވާ ރެޕް އާޓިސްޓް އިސްމާއީލް އިފްހާމް މުހައްމަދު (ޕެސްޓު)އާ މަސްތުވާތަކެއްޗާ ގުޅުވާ ދައުލަތުން ދެއްކި ވާހަކަތަކަށް ޕެސްޓްގެ ވަކީލުންގެ ސުވާލު އުފައްދައިފިއެވެ.
މިއަހަރު ފެބްރުއަރީ މަހު މާލޭގައި ހިންގި އޮޕަރޭޝަނެއްގެ ތެރެއިން ފުލުހުން ޕެސްޓް ހައްޔަރު ކޮށްފައިވާއިރު، އެ މައްސަލައާ ގުޅިގެން އިތުރު ތިން މީހަކުވެސް ހައްޔަރުކޮށްފައިވެއެވެ. ފުލުހުން ބުނެފައިވަނީ އެމީހުންގެ އަތުން 2.5 ކިލޯގެ މަސްތިވާތަކެތި ފެނިފައިވާކަމަށެވެ.
މި މައްސަލައިގައި ފަސް ދައުވާއެއް ޕެސްޓްގެ މައްޗަށް އުފުލާފައިވާއިރު މީގެ ކުރިންވެސް މި މައްސަލައިގައި ޕެސްޓް ހުރީ ޝަރީއަތް ނިމެންދެން ބަންދުކޮށްފައެވެ. އެހެންނަމަވެސް ހެއްކެއްގެ ގޮތުގައި ހުށަހަޅާފައިވާ ސީސީޓީވީ ފުޓޭޖުތަކާއި އޭގެ އެނާލިސިސް ރިޕޯޓް ހުށަހަޅާފައިނުވާތީ ބަންދު ރިވިއުކޮށް ގާޒީ އޭރު ނިންމެވީ 30 ދުވަހަށް ޕެސްޓް ބަންދު ކުރުމަށެވެ.
އެ މައްސަލައިގައި މިއަދު އަޑުއެހުމެއް ތާވަލުކޮށް ކްރިމިނަލް ކޯޓުގައި ކުރިއަށް ގެންދިޔައިރު މިއަދުވެސް ކުރިއަށް ގެންގޮސްފައިވަނީ ބަންދު މުރާޖާ ކުރުމުގެ ބައެވެ. އެގޮތުން ދައުލަތުން މިއަދު ވަނި މި މައްސަލައާ ގުޅޭ ސީސީޓީވީ ފުޓޭޖުތަކާއި އޭގެ އެނާލިސިސް ރިޕޯޓް ހުށަހަޅާފައެވެ.
ޕެސްޓްގެ ބަންދާއި ގުޅޭގޮތުން ވާހަކަ ދައްކަވަމުން ދައުލަތުގެ ވަކީލް ވިދާޅުވީ މި މައްސަލައާ ގުޅޭ ފުލުހުންގެ އިންޓެލް ރިޕޯޓެއް އެބައޮތްކަމަށާއި، އެޔަށް ބަލާއިރު ޕެސްޓަކީ މި މައްސަލައިގައި ދެންތިބި މީހުންނާއި ގުޅިގެން މަސްތުވާތަކެތި ޓްރެފިކްކޮށް، ރަށްރަށަށް ފުޅާ ދާއިރާއެއްގައި މަސްތުވާތަކެތި ފޮނުވައި، އޭގެ މާލީ މަންފާ ހޯދަމުންދާ ބައެއްކަން އެނގޭކަމަށެވެ. އަދި އެކަމަށް ހެކި ހުރި ކަމަށެވެ. އަދި ޖަމާއަތް ހަދައިގެން މަސްތުވާތަކެތި ޓްރެފިކް ކުރުމަކީ ބޮޑު ކުށެއްކަމަށާއި، އެއީ މުޖުތަމައުއަށް ނުރައްކާވާފަދަ ކުށެއްކަމަށްވެސް ދައުލަތުން ބުނެފައިވެއެވެ. އަދި ސީސީޓީވީ ފުޓެޖާއި އެނަލަސިސް ރިޕޯޓަށް ބެލުމުން މަސްތުވާތަކެތި ފެނިފައިވާ ގެއަށާއި އެ ގޯޅިއަށް ޕެސްޓް ވަދެހަދާތަން ފެންނަކަމަށާއި، އަދި މަސްތުވާތަކެތި ފެނިފައިވާ ފަންކާފޮށިގަނޑު އެހެންމީހުންނާ އެކު ބޯޓަށް އަރުވާ މަންޒަރު ވެސް ފެންނަކަމަށެވެ. އަދި މަސްތުވާތެކިތި ފެނުނު ގޭގެ ކޮޓަރިއަކުން ޕެސްޓްގެ ފިންގަޕްރިންޓް ފެނިފައިވާކަމަށެވެ. އެހެންކަމުން އެކަށީގެންވާ ހެކި ހުރުމުން ޝަރީއަތް ނިމެންދެން ޕެސްޓް ބަންދު ކުރުމަށް ދައުލަތުން އެދުނެވެ.
ދައުލަތުގެ ވާހަކަތަކަށް ރައްދުދީ ޕެސްޓްގެ ވަކީލް އަބްދުﷲ ޝާއިރު ވިދާޅުވީ ޕެސްޓް ބަންދުގައި ބެހެއްޓުމަށް ދައުލަތުން މައިގަނޑުކޮށް ދައްކަނީ މަސްތުވާތަކެތި ފެނުނު ގޭގެ ކޮޓަރިން ފެނުނު ފިންގަޕްރިންޓްގެ ވާހަކައާއި ސީސީޓީވީގެ ވާހަކަކަމަށެވެ. ސީސީޓީވީ ވީޑިއޯ އާ ގުޅޭގޮތުން ޝާއިރު ވިދާޅުވީ އެ ވީޑިއޯއިން ފެންނަކަމަށް ދައުލަތުން ބުނަނީ ޕެސްޓް އެ ގޯޅިއަށް ނުވަތަ އެ ގެޔަށް ވަންނަ މަންޒަރު ފެންނަކަމަށާއި، އެހެންނަމަވެސް އެ ކޮޓަރިއަށް ވަންނަ ކަމަށް ފެންނަ އެއްވެސް އެއްޗެއް ނެތްކަމަށެވެެ. އަދި އެ ގޭގެ ވެރިފަރާތުން، ޕެސްޓް އެގެޔަށް ވަދެ އުޅޭތަން ނުފެންނަ ކަމަށް ބުނެފައިވާކަމަށާއި، އަދި އެތަން ކުއްޔަށް ދީފައިވަނީ ޕެސްޓަށް ނޫންކަމަށް ބުނެފައިވާކަމަށެވެ. ޕެސްޓްގެ އަނެއް ވަކީލް ޔާމީން، ސީސީޓީވީ އެނަލިސިސް ރިޕޯޓާއި ގުޅޭގޮތުން ވިދާޅުވީ އެ ރިޕޯޓާ ގުޅޭގޮތުން ސީދާ ވާހަކަ ދެއްކުމަށް އެ ރިޕޯޓް ބޭނުންވާ ކަމަށާއި، ދައުލަތުން މިއަދު އެ ރިޕޯޓް ކޯޓަށް ހުށަހެޅުމުން އަދި އެ ރިޕޯޓް ލިބިފައިނުވާކަމަށެވެ.
މީގެ އިތުރުން ވަކީލް ޝާއިރު ވާހަކަ ދައްކަވަމުން ވިދާޅުވީ، މަސްތުވާތަކެތި ފެނުނު ގޭގެ ކޮޓަރިން ޕެސްޓްގެ ފިންގަޕްރިންޓް ފެނުނުކަމަށް ދައުލަތުން ބުނިއިރު އެ ފިންގަޕްރިންޓް ފެނިފައިވަނީ ކޮޓަރިން ނޫންކަމަށެވެ. އެހެންނަމަވެސް ޕެސްޓްގެ އެއް އިނގިލީގެ ފިންގަޕްރިންޓް ފެނިފައިވަނީ އެ ކޮޓަރީގައި ހުރި ފޮށްޓެއްގެ ބޭރުންކަމަށާއި، އެވަރުން ޕެސްޓް އެ ކޮޓަރިއަށް ވަދެފައިވާކަން ސާބިތު ނުކުރެވޭނެކަމަށެވެ. ސަބަބަކީ އެ ފޮއްޓަކީ ކޮޓަރީގެ ބަޔަކަށް ނުވަތަ ކޮޓަރީގެ ގޮތުގައި ބެލެވޭ އެއްޗަކަށް ނުވާތީއެވެ. އަދި ކޮޓަރީގައި ހުރި ފޮއްޓަކުން ފިންގަޕްރިންޓެއް ފެނުނުނަމަވެސް އެއީ ކޮޓަރިން ފެނުުނުކަމަށް ނުވާނެކަމަށްވެސް ވިދާޅުވިއެވެ. މީގެ އިތުރުން ޝާއިރު ވިދާޅުވީ އެ ކޮޓަރިން ފެނުނު ކަމަށްބުނާ އެއްވެސް މަސްތުވާ އެއްޗަކުން ޕެސްޓްގެ ފިންގަޕްރިންޓް ފެނިފައިނުވާކަމަށާއި، އަދި އެ މަސްތުވާތަކެތި ފެނިފައިވަނީ ޕެސްޓްގެ އެކްސްކްލޫސިވް ޕޮޒިޝަން ނުވަތަ ހިޔާސަތުން ނޫންކަމަށެވެ.
މީގެ އިތުރުން ބޯޓަށް އެރުވި ފަންކާ ފޮށިގަނޑުން ފެނުނު މަސްތުވާތަކެއްޗާ ގުޅޭގޮތުން ވާހަކަ ދައްކަވަމުން ޝާއިރު ވިދާޅުވީ އެ ފަންކާ ބޯޓަށް އެރުވި ވަގުތުން ފެށިގެން ފުލުހުންގެ ބެލުމުގެ ދަށަށް ގެންދިއުމާ ހަމައަށް، އޭގެތެރެއަށް އެހެން ބަޔަކަށް އެއްޗެއްލުމުގެ ފުރުސަތު އޮތްކަމަށެވެ.
އެހެންކަމުން މި މައްސަލައިގައި ފެނުނު 2.5 ކިލޯގެ މަސްތުވާތަކެއްޗާ ޕެސްޓްއާ ގުޅުވާ ގޮތްތަކަކީ ކޮބައިތޯ ޝާއިރު ސުވާލު އުފެއްދެވިއެވެ. އަދި ޕެސްޓްގެ މީގެ ކުރިން މަސްތުވާތަކެތި ޓްރެފިކް ކުރުމުގެ ރިކޯޑެއް ނެތްކަމަށާއި، މިމައްސަލައިގައިވެސް ޓްރެފިކް ކުރުމަށް އެކަށޭނަ ވަރަކަށް ހެކި ނެތްކަމަށެވެ. އެހެންކަމުން ޕެސްޓް ބަންދުން ދޫކުރަންޖެހޭކަމަސް ޝާއިރު ވިދާޅުވިއެވެ.
މިއަދުގެ އަޑުއެހުމުގައި ޕެސްޓްގެ ބަންދާމެދު ދެފަރާތަށް ވާހަކަދެއްކުމުގެ ފުރުސަތު ދިނުމަށްފަހު މައްސަލަބައްލަވާ ގާޒީ ނިންމެވީ، ހެކިތަކަށްބަލާ ތުހުމަތުކުރެވޭ އެކަށީގެންވާ ހެކި ހުރުމުން، ޕެސްޓް ޝަރީއަތް ނިމެންދެން ބަންދުކުރުމަށެވެ.
މިއަދުގެ އަޑުއެހުމުގައި ޕެސްޓް އެއްވެސް އެއްޗެކޭ ބުނެފައެއް ނުވެއެވެ.
މީގެ އިތުރުން މިއަދުގެ އަޑުއެހުމުގައި، މި މައްސަލައިގައި ދައުވާ އުފުލާފައިވާ ލ. ގަން-ތުނޑި / އަބަދަށްއުފާ، މުހައްމަދު ސުއައިދު ޝަރީއަތް ނިމެންދެން ބަންދު ކުރުމަށް އަދި، މައްސަލާގައި ދެން ދައުވާކޮށްފައިވާ އަހުމަދު ހުސާމްގެ ބަންދަށް އިތުރު 30 ދުވަސް، މައްސަލަ ބެއްލެވި ގާޒީ ޖަހާފައިވެއެވެ. މިމައްސަލައިގައި އަޑުއެހުމެއް އަންނަ މަހުގެ ކުރީކޮޅު ބޭއްވުމަށް ވެސް ގާޒީ ވަނީ ނިންމަވާފަ އެވެ.