ވަޒީފާ ގެއްލިގެން ޑރ.އިޔާޒު ގުޑުންއަރާނެ ކަމަށް ހީކުރުމަކީ ކުށްހީއެއް: ޒައިދު

ވަޒީފާގެއްލިގެން ޑރ.އިޔާޒަށް ގުޑުންއަރާނެކަމަށް ލާދީނީމީހުން ހީކުރާނަމަ އެއީކުށްހީއެއް ކަމަށް ޝެއިޚް އަލީ ޒައިދު ވިދާޅުވެއްޖެއެވެ.

ޝެއިޚް ޒައިދު މިހެން ވިދާޅުވީ މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) ގެ ލެކްޗަރާގެ މަގާމުން ވަކިކުރުމުން އެކަމަށް އިޝާރާތް ކުރައްވާ ކުރެއްވި ޓްވީޓެއްގައެވެ.

"ޑރ.އިޔާޒަކީ އެއްވެސްއިރަކު ވަޒީފާގެ އަޅެއްނޫން! ވަޒީފާގެއްލިގެން އެމަނިކުފާނަށް ގުޑުންއަރާނެކަމަށް ލާދީނީމީހުން ހީކުރާނަމަ އެއީކުށްހީއެއް! އެމަނިކުފާނު ފަހަތަށް އެންމެއިންޗިއެއްވެސް ޖެހިވަޑައެއް ނުގަންނާނެ! 2ގުނަ ބާރަށް މަސައްކަތްޖައްސަވާނެ! ﷲ އެމަނިކުފާނަށް ސާބިތުކަން ދެއްވާށި!" ޝެއިޚް ޒައިދު ވިދާޅުވިއެވެ.

އެމްއެންޔޫގެ ވައިސް ޗާންސިލަރު ޑރ. މުހައްމަދު ޝަރީފް ބައެއް މީޑިޔާތަކަށް މައުލޫމާތު ދެއްވަމުން އިޔާޒު ވަކިކޮށްފައިވަނީ ތަފާތު އެކި ފަހަރުމަތިން ނަސޭހަތްދީގެން ވެސް އިސްލާހުނުވުމާ ގުޅިގެން ކަމަށް ވަނީ ވިދާޅުވެފައެވެ. އެކަމާ ގުޅިގެން ޝަރީފް ޓެގް ކުރައްވައި އިޔާޒު ވެސް ވަނީ ޓްވީޓެއް ކުރައްވާފައެވެ. އެ ޓްވީޓްގައި އިޔާޒް ވިދާޅުވީ ތިޔަބައި މީހުންނަށް ޙުކުމްކޮށް އަދަބު ދެވޭނީ މިދުނިޔެ މަތީގައި ކަމަށާއި ނަމަވެސް މާތްﷲ އިރާދަކުރެއްވިއްޔާ އޭނާ އަށް ނިކަމެތި ކަމެއް ނުލިބޭނެ ކަމަށެވެ.

އިޔާޒު އެ ވަޒީފާއިން ވަކިކޮށްފައިމިވަނީ އަންހެން ކުދިން ހިތާނުކުރުމަށް ހިތްވަރުދޭ ކަމަށް ބުނެ އިޔާޒު ކުރެއްވި ޓްވީޓެއްގެ މައްސަލަ އިސްލާމިކް މިނިސްޓްރީން ބަލަމުން ދަނިކޮށެވެ. އެ ޓްވީޓާއި ގުޅިގެން ރައްޔިތުންގެ މަޖިލީހަށް ވަނީ މައްސަލައެއް ވެސް ވައްދާފައެވެ. އެ މައްސަލަ މަޖިލީހަށް ވެއްދީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމެވެ.

މީކާއިލް މަޖިލީހަށް ހުށަހަށާފައިވާ މައްސަލައިގައި ބުނެފައިވަނީ، ރާއްޖޭގެ ޤައުމީ ޔުނިވަރސިޓީގެ އެސިސްޓަންޓް ޕްރޮފެސަރ ޑރ. މުޙައްމަދު އިޔާޒު، އަންހެނުން ހިތާނުކުރުމުގެ ނަމުގައި ހިންގާ، "ފީމޭލް ޖެނިޓަލް މިއުޓިލޭޝަން" (އެފްޖީއެމް) ފަދަ ނުރައްކާތެރި އަމަލުތަކަށް ހިތްވަރު ލިބޭ ގޮތަށް މުއައްސަސާތަކުގެ ޒިންމާދާރު މަޤާމުތަކުގައި ތިއްބަވާ ބޭފުޅުން މަސައްކަތް ކުރެއްވުމަކީ ކަންބޮޑުވާކަމެއްކަމަށެވެ.