އަހަރު ދެބައި، ބައިމިލިއަން ފަތުރުވެރިން ރާއްޖެ އަތުވެއްޖެ

01 ޖެނުއަރީ 2021 އިން ފެށިގެން 30 ޖޫން 2021 ގެ ނިޔަލަށް މިހާތަނަށް 510،549 ފަތުރުވެރިން ރާއްޖެއަށް ޒިޔާރަތް ކޮށްފިއެވެ.

އަހަރު ދެބައިވީ އިރު ރާއްޖެއަށް ޒިޔާރަތް ކުރި ފަތުރުވެރިންނަށް ބަލާލާއިރު އެންމެ ބޮޑު މާކެޓެއް ކަމުގައި ބެލެވިފައިވަނީ ރަޝިޔާއެވެ. ރަޝިޔާއިން މި އަހަރު މިހާތަނަށް 124،651 ފަތުރުވެރިން ވަނީ ރާއްޖެ އައިސްފައެވެ. މި ލިސްޓްގެ ދެވަނައިގާ އޮތީ އިންޑިއާއެވެ. އިންޑިއާގެ 89،675 ފަތުރުވެރިން ރާއްޖެއަށް ޒިޔާރަތް ކޮށްފައިވާ އިރު ޖަރުމަނުގެ 27،838 ފަތުރުވެރިން ރާއްޖެއަށް ޒިޔާރަތްކޮށް ވަނީ ލިސްޓްގެ 3 ވަނަ ހޯދާފައެވެ. މީގެ އިތުރުން ރާއްޖެއަށް ފަތުރުވެރިން އައިސްފައިވާ ޤައުމުތަކުގެ ތެރޭގައި ޔޫކްރެއިން، އެމެރިކާ، ކަޒަކިސްތާން، ޔޫކޭ، ރޫމޭނިއާ، ފްރާންސް އަދި ޗެކް ރިޕަބްލިކް ހިމެނެއެވެ.

ކޯވިޑް 19 ގެ ސަބަބުން ފަތުރުވެރިކަމަށް ވަނީ ބޮޑެތި ހީނަރުކަމެއް އައިސްފައެވެ. އެ ގޮތުން ބަލާލާއިރު 2019 ވަނަ އަހަރު ރާއްޖެއަށް ޒިޔާރަތް ކޮށްފައިވަނީ 1،702،887 ފަތުރުވެރިން ކަމުގައިވާ އިރު ޖެހިގެން އައި 2020 ވަނަ އަހަރު މި އަދަދު ވަނީ ބޮޑުތަނުން މަދުވެފައެވެ. 2020 ވަނަ އަހަރު ރާއްޖެއަށް ޒިޔާރަތް ކޮށްފައިވަނީ 555،494 ފަތުރުވެރިންނެވެ.

މެއި 2021 ން ފެށިގެން ރާއްޖެއަށް އަންނަ ފަތުރުވެރިންގެ އަދަދު ވަނީ މަދުވެފައެވެ. ކޯވިޑް 19ގެ ހާލަތު އިތުރަށް ޤައުމުގައި ގޯސްވުމުގެ ސަބަބުން އަޅާފައިވާ އިތުރު ފިޔަވަޅުތަކުގެ ސަބަބުން ފަތުރުވެރިންގެ އަދަދު ވަނީ މަދުވެފައެވެ. ނަމަވެސް 2021 ފެށިގެން އައިއިރު 2020 ވަނަ އަހަރާއި އަޅާބަލާއިރު ރާއްޖެއަށް ޒިޔާރަތް ކުރި ފަތުރުވެރިންގެ އަދަދު ގިނަވަމުން އައެވެ.

ރާއްޖޭގެ ފަތުރުވެރިކަމުގެ ޓޮޕް މާކެޓްގެ ތެރޭގައި ހިމެނޭ ރަޝިޔާއަދި އިންޑިއާއިން ރާއްޖެއަށް މިއަހަރު އައިސްފައިވާ ފަތުރުވެރިންގެ ތެރޭގައި ނިސްބަތުން ގިނައީ ފަންނާނުންނެވެ. މަޝްހޫރު ތަރިންނެވެ.

ކޮވިޑްގެ ހާލަތުން ރާއްޖެ އަރައިގަނެވިއްޖެނަމަ އަހަރު ނިމުމާއި ހަމަޔަށް އެކަށީގެންވާ އަދަދަކަށް ފަތުރުވެރިން ރާއްޖެއަށް ޒިޔާރަތް ކުރާނެ ކަމަށް ލަފާކުރެވެއެވެ.