ބައެއް މީހުންނާއި އިންޑިއާގެ ބައެއް މީޑިއާތަކުން ވެސް އޭނާ އަށް ދިމާއަށް "ކެޓް" އާ ކިޔާތީ ހިތްހަމަނުޖެހޭ ކަމަށާއި އެއީ ކާކު ކޮން އިރަކު ދީގެން އުޅޭ ނަމެއް ކަމެއް ވެސް ނޭނގޭ ކަމަށް ކެޓްރީނާ ކެއިފް ބުނެފި އެވެ.
ދާދި ފަހުން ދުބާއީގައި އޮތް އިވެންޓެއްގައި ކެޓްރީނާ ބުނީ "ހަމަ ތެދެއް މި ބުނީ މަށާ ދިމާއަށް ކެޓް އޭ ކިޔާތީ ވަރަށް ހިތްހަމައެއް ނުޖެހޭ" ކަމަށެވެ.
ބޮލީވުޑްގެ އެންމެ ނުފޫޒު ގަދަ ބަތަލާއިންގެ ތެރޭގައި ހިމެނޭ ކެޓްރީނާ ބުނީ އެ ނަމަކީ އޭނާ އަށް ކާކު ދީގެން އުޅޭ ކަމެއް ވެސް މިހާތަނަށް ނޭނގޭ ކަމަށެވެ.
އެހެންވެ އެންމެން ވެސް އޭނާގެ އަސްލު ނަމުން މުހާތަބް ކުރަން ކެޓްރީނާ ވަނީ އެދިފަ އެވެ.
އިނގިރޭސިވިލާތަށް އުފަން ކެޓްރީނާގެ ކުރިއަށް ހުރި ފިލްމްތަކުގެ ތެރެއިން އެންމެ އަވަހަށް ރިލީޒް ވާނީ މި މަހުގެ 20 ގައި ރިލީޒްވާ "ދޫމް 3" އެވެ.
މި ފިލްމްގައި އޭނާގެ ކޯ ސްޓާރަކީ އާމިރް ހާނެވެ.