20 އަހަރަށްފަހު އެމެރިކާގެ ސިފައިން އަފްޣާނިސްތާނުން ފައިބިފިއެވެ.
ތާލިބާނުންނާއި އަލްޤައިދާގެ އަސަރު ފޮހެލުމުގެ ބޭނުމުގައި 20 އަހަރު ކުރިން އަފްޣާނިސްތާންގެ ބަގްރަމް އެއާބޭސްގައި ހަރަކާތްތެރިވާން ފެށި އެމެރިކާގެ ސިފައިން މިދިޔަ ހުކުރު ދުވަހު ވަނީ ރަސްމީކޮށް އެ އެއާބޭސް އަފްޣާނިސްތާނުގެ ސަލާމަތީ ބާރުތަކާއި ހަވާލުކޮށްފައި ކަމަށް އެ ޤައުމުގެ ނޫސްތަކުން ރިޕޯޓް ކުރެއެވެ.
ބަގްރަމް އެއާބޭސްގައި 100،000 އަށްވުރެ ގިނަ ސިފައިން ވަނީ ހަރަކާތްތެރިވެފައެވެ. ރޮއިޓާސް ރިޕޯޓްތައް ބުނާގޮތުގައި އެ އެއާބޭސް ހޮނިހިރު ދުވަހު ސަރުކާރާއި ހަވާލު ކުރުމުގެ ރަސްމިއްޔާތު ބޭއްވުމަށް ވަނީ ހަމަޖެހިފައެވެ.
ސަރުކާރާއި އެ އެއާބެސް ހަވާލު ކުރުމުން ދޭހަވަނީ ބާކީ އެތަނުގައި މިވަގުތު ތިބި 2500 އާއި 3500 ދެމެދުގެ އަދަދެއްގެ އެމެރިކާ ސިފައިން ވެސް އެތަނުން ފުރަން ތައްޔާރުވާ ކަމެވެ. މިއީ ސެޕްޓެމްބަރުގެ ނިޔަލަށް އެ ޤައުމުން އެމެރިކާގެ ސިފައިން ބާލުވާނެކަމަށް އެމެރިކާގެ ރައީސް ޖޯ ބައިޑެން ވެފައިވާ ވަޢުދު އޭނާ ފުއްދަމުންދާ ކަމުގެ ހެއްކެކެވެ.