ޖިންސީ ގޯނާގެ މައްސަލަތަކެއްގައި ދައުވާ އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ހިފެހެއްޓުމަށް އެދި ކްރިމިނަލް ކޯޓަށް ހުށަހެޅި މައްސަލައިގައި އޭނާގެ ޕާސްޕޯޓް ހިފެހެއްޓުމުގެ އަމުރެއް ކޯޓުން ނުދިން ކަމަށް ޕްރޮސިކިއުޓަރ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.
އަލީ ވަހީދުގެ ޕާސްޕޯތް ހިފެހެއްޓުމަށްއެދި ފުލުހުން ކްރިމިނަލް ކޯޓުގައި އަމުރަކަށސް އެދިފައިވަނީ ޖޫން 23 ވަނަ ދުވަހުއެވެ.
ޕީޖީ ޝަމީމް އަމިއްލަފުޅު ބްލޮގްގައި އާންމު ކުރެއްވި އޯޑިއޯ ޕޯސްޓްގައި ބުނެފައިވަނީ، އަމުރަށް އެދިފައިއޮތް މައްސަލައިގައި މިއަދު ކޯޓުން ގޮތެއް ނިންމަވާފައިވާކަމަށެވެ. އެގޮތުން އަލީ ވަހީދުގެ ޕށްޕޯތް ހިފެހެއްޓުމުގެ މަގްސަދެއް އޮތްކަމެއް ނުދެކޭތީ، ފުލުހުން ހުށަހަޅާފައިވާ ގޮތަށް އަމުރެއް ނެރެދެވެން ނެތްކަމަށް ކްރިމިނަލް ކޯޓުން ނިންމާފައިވާކަމަށެވެ.
"މި ނިންމުން ނިންމާފަ އޮންނަނީ ގާޒީ ހަސަން ސައީދު މިއަދު ހެނދުނު 10:00 ގައި. އަޅުގަނޑުމެންނަށް މި ލިޔުން ލިބިފަވޭ މިއަދު ހެނދުނު ގާތްގަނޑަކަށް 09:37 ހާއިރު." ޕީޖީ ޝަމީމް ވިދާޅުވިއެވެ.
ޝަމީމް ވިދާޅުވީ ކްރިމިނަލް ކޯޓުގެ ނިންމުން ހައިކޯޓުގައި އިސްތިއުނާފު ކުރާނެކަމަށެވެ. ޝަމީމް ވިދާޅުވީ އަލީ ވަހީދަކީ ފިލައިގެން އުޅޭމީހެއްކަމަށާއި، އެގޮތުން ހައިކޯޓާއި ސުޕްރީމް ކޯޓަށް އަލީ ވަހީދު ނުފެނިގެން އުޅުނުކަން ލިޔެކިޔުމުން އެނގެން އޮތްކަމަށެވެ. އެހެންކަމުން އަލީ ވަހީދުގެ ޕާސްޕޯތް ހިފަހައްޓަން ޖެހޭ ސަބަބެއް އޮތްކަމަށް ޤަބޫލުކުރެވޭކަމަށް ޝަމީމް ވިދާޅުވިއެވެ.
އަލީ ވަހީދުގެ މައްސަލައާ ގުޅުންހުރި އިތުރު މައްސަލައެއްވެސް ޕީޖީގެ ފަރާތުން ވަނީ ހައިކޯޓުގައި އިސްތިއުނާފު ކޮށްފައެވެ. އެގޮތުން އަލީ ވަހީދު ރާއްޖެއިން ބޭރުގައި ބަހައްޓައިގެން ޝަރީއަތް ކުރިއަށް ގެންދިއުމަށް ކްރިމިނަލް ކޯޓުން ނިންމި ނިންމުން ޕީޖީގެ ފަރާތުން ހައިކޯޓުގައި އިސްތިއުނާފު ކުރި މައްސަލަ މިހާރު ވަނީ އެކޯޓަށް ބަލައިގެންފައެވެ.