ފިލިޕިންސްގެ މިލިޓަރީ މަތިންދާ ބޯޓެއް ވެއްޓި 29 މީހުން މަރުވެއްޖެއެވެ.
ވެއްޓުނު މަތިންދާ ބޯޓުގައި ގިނައިން ދަތުރު ކޮށްފައިވަނީ އެ ޤައުމުގެ ސިފައިންނެވެ. ޖުމްލަ 92 މީހުން ދަތުރުކުރި ބޯޓުން ސަލާމަތްވެފައި ވަނީ 50 މީހުންނެވެ، އެ މީހުން ވަނީ ހޮސްޕިޓަލަށް ގެންދެވި ފަރުވާދޭން ފަށާފައެވެ.
ވެއްޓިފައިވަނީ ސިފައިން އެއްތަނުން އަނެއްތަނަށް ގެންދިޔުމަށް ބޭނުންކުރާ ބޯޓެއް ކަމަށާއި މި ބޯޓު ވެއްޓިފައިވަނީ އާދީއްތަ ދުވަހު ޖޯލޯ އައިލެންޑްއިން ސުލޫ އައިލެންޑަށް މީހުން ގޮވައިގެން ދަނިކޮށް މެންދުރުގެ ވަގުތެއްގައި ކަމަށް އެ ޤައުމުގެ ޑިފެންސް ސެކްރެޓަރީ ޑެލްފިން ލޮރެންޒާނާ ނެރުނު ބަޔާނެއްގައި ވިދާޅުވެފައިވެއެވެ.
މިލިޓަރީން ހާމަކޮށްފައިވާ ގޮތުގައި ބޯޓުގައި އެވަގުތު ތިބި 3 ޕައިލެޓުން ވެސް ވަނީ މި ހާދިސާގައި ސަލާމަތް ވެފައެވެ. އެހެން ނަމަވެސް އެމީހުން ވަނީ ވަރަށް ބޮޑަށް ޒަޚަމްވެފައި ކަމަށާއި ހާލަތު ސީރިއަސް ކަމަށް މިލިޓަރީއިން މައުލޫމާތު ދެއެވެ.
އަނދަމުންދާ މަތިންދާ ބޯޓުގެ ތެރެއިން ދިރިތިބި ބައެއް މީހުން ފެނިފައިވާ ކަމަށާއި އަދިވެސް އިތުރު ބަޔަކު ފެނޭތޯ މަސައްކަތް ކުރަމުން އަންނަ ކަމަށް ވެސް ރިޕޯޓްތައް ބުނެއެވެ.