ފިލިޕިންސްގެ މިލިޓަރީ މަތިންދާ ބޯޓެއް ވެއްޓި މަރުވި މީހުންގެ އަދަދު 45 އަށް އަރައިފިއެވެ.
ވެއްޓުނު މަތިންދާ ބޯޓުގައި ގިނައިން ދަތުރު ކޮށްފައިވަނީ އެ ޤައުމުގެ ސިފައިންނެވެ. ޖުމްލަ 92 މީހުން ދަތުރުކުރި ބޯޓުން މިހާތަނަށް 45 މީހުން މަރުވެފައިވާ ކަމަށް ރިޕޯޓްތައް ބުނެއެވެ. އަދި 53 މީހުން ވަނީ ވަރަށް ބޮޑަށް ޒަޚަމްވެފައެވެ.
ބޯޓު ރަންވޭއިން ނައްޓާލައިގެން ތަންކޮޅަކަށް ދިޔަތަނާ ދުން ފެންނަން ފެށިކަމަށާއި އެއަށްފަހު އަލިފާން ރޯވެ ބޯޓު ވެއްޓުނުކަމަށް ވެއެވެ. އެ ބޯޓުގައި ބައެއް އާންމު ރައްޔިތުން ވެސް ސިފައިންނާއިއެކު ދަތުރު ކުރިއެވެ. އެ ގޮތުން މަރުވި މީހުންގެ ތެރޭގައި 3 އާންމު މީހުންވެސް ހިމެނެއެވެ. ބޯޓުގައި ދަތުރުކުރި 3 ޕައިލެޓުން ސަލާމަތްވިއެވެ. ނަމަވެސް ވަރަށް ބޮޑަށް ޒަޚަމްވެ އެ 3 މީހުންނަށް ވެސް ދަނީ ހޮސްޕިޓަލުގައި ފަރުވާދެމުންނެވެ.
ވެއްޓިފައިވަނީ ސިފައިން އެއްތަނުން އަނެއްތަނަށް ގެންދިޔުމަށް ބޭނުންކުރާ ބޯޓެއް ކަމަށާއި މި ބޯޓު ވެއްޓިފައިވަނީ އާދީއްތަ ދުވަހު ޖޯލޯ އައިލެންޑްއިން ސުލޫ އައިލެންޑަށް މީހުން ގޮވައިގެން ދަނިކޮށް މެންދުރުގެ ވަގުތެއްގައި ކަމަށް އެ ޤައުމުގެ ޑިފެންސް ސެކްރެޓަރީ ޑެލްފިން ލޮރެންޒާނާ ނެރުނު ބަޔާނެއްގައި ވިދާޅުވެފައިވެއެވެ.