"ވޯންޓެޑް" އާއި "ސަލާމޭ އިޝްގް" ފަދަ ފިލްމްތަކުން ފެނިފައިވާ އައިޝާ ޓާކިއާ ފިރިހެން ކުއްޖަކު ވިހައިފި އެވެ.
މި މަހުގެ 10 އާއި 15 އާ ދޭތެރޭ ދުވަހެއްގައި އައިޝާ ވިހާނެ ކަމަށް ބުނެފައި ވަނިކޮށް އޭގެ ކުރިން އައިޝާ ވިހޭކަން އޭނާގެ ފިރިމީހާ ވަނީ ޓްވިޓާ މެދުވެރިކޮށް ފޭނުންނާ ހިއްސާކޮށްފަ އެވެ.
"ﷲ އަކްބަރު…ﷲ އަކްބަރު…އެއީ ފިރިހެން ކުއްޖެއް" އައިޝާގެ ފިރިމީހާ އަދި ރެސްޓޯރެންޓް ހިންގާ ޒުވާން ވިޔަފާވެރިޔާ ފަރްހާން އަޒުމީގެ ޓްވީޓްގައިވެ އެވެ.
އައްބާސް/މަސްތާންގެ "ޓާޒަން" އިން ބޮލީވުޑަށް 2004 ވަނަ އަހަރު ތައާރަފްވި އައިޝާ މަންމައަކަށްވުމާ ގުޅިގެން އޭނާ ވެސް ވަނީ ޓްވިޓާ މެދުވެރިކޮށް ތަހުނިޔާ ފޮނުވި ފަރާތްތަކަށް ޝުކުރު އަދާކޮށްފަ އެވެ.
"އަހަންނާއި އަހަރެންގެ ދަރިފުޅުގެ ނަމުގައި ހެޔޮ އެދޭ ހުރިހާ ފަރާތްތަކަށް ޝުކުރު އަދާ ކުރަން." އައިޝާގެ ޓްވީޓްގައިވެ އެވެ. "ވަރަށް ބޮޑަށް ޝުކުރިއްޔާ."
އުމުރުން 27 އަހަރުގެ އައިޝާ އާއި ފަރްހާން ކައިވެނި ކުރީ 2009 ގަ އެވެ.