އާމްދަނީން ޓެކްސް ނެގުމުގެ ބިލް އިސްލާޙްކޮށް މުޅި މަޖިލީހުގެ ކޮމިޓީން ބިލު ފާސްކޮށް ތަޅުމަށް ފޮނުވަން ނިންމައިފިއެވެ.
މަޖިލީހުގެ ކޮމިޓީއަށް ރިޕޯޓް ހުށަހެޅުއްވީ މިލަންދޫ ދާއިރާގެ މެމްބަރު އަލީ ރިޒާއެވެ. މެމްބަރު ރިޒާ ރިޕޯޓް ހުށަހެޅުއްވި އިރު ވަނީ ބިލުގެ 36 ވަނަ މާއްދާއަށް އިތުރު އިސްލާހެއް ހުށަހަޅުއްވާފައެވެ.
މެމްބަރު ރިޒާ އިސްލާހް ހުށަހަޅުއްވަމުން ވިދާޅުވީ އާމްދަނީން ޓެކްސް ނެގުމުގެ ގާނޫނުގެ 50 ވަނަ މާއްދާގެ ފަހަތަށް އަކުރެއް އިތުރު ކުރުމަށް ހުށަހަޅުއްވާ ކަމަށެވެ. އެގޮތުން އެ މާއްދާގެ (އ) ގައި ބުނެފައިވާ ގޮތުން ފައިސާ ލިބޭ ފަރާތުން ދައްކާފައިވާ ޓެކުހުގެ އަދަދަކީ އެފަރާތުން އެ ހިސާބުކުރާ މުއްދަތަށް ދައްކަންޖެހޭ ޖުމްލަ ޓެކުހުގެ އަދަދުން ކެނޑިދާނެ އަދަދެކެވެ.
އެ އިސްލާހު ބިލުގައި ހިމެނުމަށް މުޅި މަޖިލީހުގެ ކޮމިޓީގައި ވޯޓަށް އެއްސެވުމުން ވޯޓުގައި ބައިވެރިވެވަޑައިގެންނެވި 26 މެމްބަރުންގެ ތެރެއިން 25 މެމްބަރުން ވަނީ އިސްލާހަށް ތާޢީދު ކުރައްވާ ކަމަށް ވޯޓު ދެއްވާފައެވެ. އަދި ވަކި ގޮތަކަށް ވޯޓު ނުދެއްވާ އިންނެވީ އެންމެ މެމްބަރެކެވެ.
އިޤްތިޞާދީ ކޮމިޓީން ބިލު ދިރާސާ ކުރި ގޮތުގެ ރިޕޯޓަށް ހުށަހެޅި އިސްލާާހާއެކު ބިލު ފާސްކުރުުމަށް މަޖީލީހުގެ ތަޅުމަށް ފޮނުވުމަށް މުޅި ކޮމިޓީގައި ވޯޓަށް އެއްސެވުމުން ވޯޓުގައި ބައިވެރިވެވަޑައިގެންނެވި 28 މެމްބަރުންގެ ތެރެއިން 27 މެމްބަރުން ތާއީދު ކުރެއްވި އިރު ތާއީދު ނުކުރައްވާ މެމްބަރަކު އިންނެވިއެވެ.
ބިލުގައި ހިމެނޭ މައިގަނޑު ބައިތަކަށް ބަލާލާއިރު ބިލްގައި ހިމެނެނީ ޓެކްސް ނެގޭނެ ކަންކަމުގެ ތެރެއަށް، ގާނޫނާ ޚިލާފަށް ލިބޭ މުދަލާއި ފައިސާއާއި، ހޯދި ގޮތް ނޭނގޭ މުދަލާއި ފައިސާ، އިންވެސްޓްމެންޓް، އަދި އެންމެހައި މުދާ ހިމަނައި އިތުރު ކުރުމެވެ. މީގެ އިތުރުން ބައިނަލްއަގުވާމީ ދަތުރުފަތުރުގައި ކަނޑު ބޯޓް ނުވަތަ މަތިންދާ ބޯޓް އޮޕަރޭޓްކުރާ، ރާއްޖޭގައި ވަޒަންވެރިވެފައިނުވާ ފަރާތްތަކުގެ ތެރެއިން ރާއްޖެއިން ފުރައިގެންދާ އުޅަނދަކުން ޓެކްސް ނަގާނީ އެފަރާތެއްގެ ދާއިމީ މަރުކަޒެއް ރާއްޖޭގައި ހުރި ފަރާތެއް ކަމުގައި ކަނޑައެޅުން ވެސް ހިމެނިފައިވެއެވެ.
މި ގާނޫނަށް އިސްލާހު ގެނައުމުގެ ބޭނުމަކީ، ޓެކްސް ނެގޭ އުޖޫރައިގެ ތެރެއިން އިސްތިސްނާ ބާވަތްތައް އިސްތިސްނާ ކުރުމާއި، ވަޒަންވެރިވެފައިނުވާ ފަރާތްތަކަށް ދައްކަންޖެހޭ ބޭންކް ކޮމިޝަން، އިންޓަރ ކަނެކްޝަން ޗާރޖް، އަދި ރިއިޝުއަރެންސް ޕްރިމިއަމް އިންދަ ޓެކްސް ދެއްކުމުން އިސްތިސްނާ ކުރުމާއި، ޓެކްސް ނަގަން ފެށިފަހުން ގާނޫނު ތަންފީޒު ކުރުމުގައި ހުރި ދަތިތައް ހައްލު ކުރުމާއި، އާމްދަނީން ޓެކްސް ނެގުމުގެ ނިޒާމް އިތުރަށް ހަރުދަނާ ކުރުމާއި، ގާނޫނު ތަންފީޒުކުރުމުގައި ހުރި ދަތިތައް ހައްލުކުރުމަށް ގާނޫނަށް އިސްލާހު ގެނައުން ކަމަށް ބިލްގައި ބުނެފައިވެއެވެ.
އާމްދަނީން ޓެކްސް ނެގޭނެ ހަރަކާތްތަކުގެތެރޭގައި، ރާއްޖޭގައި ފޯރުކޮށްދޭ ޚިދުމަތްތަކަށް ލިބޭ ކޮމިޝަން، ރާއްޖޭގައި މުނިފޫހި ފިލުވައިދޭ މީހުންގެ އާމްދަނީ އާއި، ރިސާރޗްތަކަށް ލިބޭ އާމްދަނީ އާއި، ރާއްޖޭގައި ވަޒަންވެރިވެފައިނުވާ ކޮންޓްރެކްޓަރަކަށް ލިބޭ އާމްދަނީ ހިމެނުމަށް ހުށަހަޅާފައިވެއެވެ. އިސްތިސްނާ ބާވަތްތަކުގެ އާމްދަނީގެ ތެރެއިން އެހެނިހެން އެއްވެސް ގާނޫނެއްގެ ދަށުން ނަގާ ޓެކްސް ހިމެނުމާއި، ރައީސާއި ނައިބު ރައީސްގެ މުސާރައާއި އެހެނިހެން އިނާޔަތްތަކާއި، ރައީސް ދިރިއުޅުއްވާ ގެކޮޅާއި، އެގެކޮޅަށް ހިނގާ ޚަރަދާއި، ރައީސަށް ޚާއްސަ ރަށާއި، ނައިބްރައީސަށް ޚާއްސަ ގެކޮޅަށް ހިނގާނެ ޚަރަދު ޓެކްސް ހިސާބު ކުރުމުގައި އިސްތިސްނާ ކުރުމަށް ވެސް ބިލްގައި ހުށަހަޅާފައިވެއެވެ.
އުމްރާނީ ވަސީލަތްތައް ތަރައްގީކުުރުމަށް ކުރާ މަސައްކަތްތަކާ ގުޅޭ ވިޔަފާރިތަަކަށް ލިބޭ އާމްދަނީ، އިކޮނޮމިކް މިނިސްޓަރުގެ ލަފާގެ މަތިން ގާނޫނުގެ ދަށުން ޓެކްސް ނެގުން ފަސް އަހަރުގެ މުއްދަތަކަށް އިސްތިސްނާކުރުމުގެ ބާރު ރައީސަށް ލިބި ދިނުމަށް ހިމަނާފައިވެއެވެ.