ލިޔުންތަކުގައި ޒަމާނުއްސުރެ ޖަހަމުން އަންނަ ރެވެނިއު ސްޓޭމްޕް ޖެހުން ހުއްޓާލަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ބިލު މަޖިލީހުން މިއަދު ފާސްކޮށްފި އެވެ.
1970ވަނަ އަހަރުން ފެށިގެން އަމަލު ކުރަމުން އަންނަ ލިޔުންތަކުގައި ރެވެނިއު ސްޓޭމްޕް ޖެހުމުގެ ގާނޫނު އުވާލަން ސަރުކާރުގެ ފަރާތުން ހުށަހެޅުއްވީ މެދު ހެންވޭރު ދާއިރާގެ މެމްބަރު އަދި މެޖޯރިޓީ ލީޑަރު އަލީ އާޒިމް އެވެ. ރެވެނިއު ސްޓޭމްޕް ޖެހުމުގެ ނިޒާމު ހިންގުމަށްޓަކައި ހިނގާ ހަރަދަށް ބަލާއިރު ލިބޭ އާމްދަނީ އަކީ އެކަށީގެންވާ އާމްދަނީއެއް ނޫން ކަމަށް އެ ބިލްގައި ބުނެފައިވެއެވެ.
މީގެ އިތުރުން ސްޓޭމްޕުން ލިބޭ ފައިސާއަކީ ދައުލަތުން ފޯރުކޮށްދޭ ހިދުމަތްތަކުން ނަގާ ފީއާއި އެނޫންވެސް ފައިސާގެ ތެރެއިން ހަމަޖެއްސޭނެ އާމްދަނީ އެއް ކަމަށް އާޒިމް ވަނީ ވިދާޅުވެފައެވެ. އަދި މި ކަމަކީ އޭގެ ސަބަބުން ހިދުމަތްތައް ހޯދައި ފަރާތްތަކަށް އިތުރު ދަތިތަކާ ކުރިމަތިލާންޖެހޭ ކަމަށް އެ ބިލުގައި ބުނެފައިވެ އެވެ.
ދައުލަތުގެ އާމްދަނީއަށް އަސަރުކުރާ ބިލެއް ކަމުން އެ ބިލު ދިރާސާކޮށް މުޅި މަޖިލީހުގެ ކޮމިޓީން ރެވެނިއު ސްޓޭމްޕް ޖެހުން ހުއްޓާލަން ފެންނަ ކަމަށް ނިންމުމަށްފަހު، މުޅި މަޖިލީހުގެ ކޮމިޓީން ނިންމި ގޮތަށް މަޖިލީހުގެ މިއަދުގެ ޖަލްސާގައި އެކަމަށް ނެގުނު ވޯޓުގައި ބައިވެރިވެވަޑައިގެންނެވި 44 މެމްބަރުންގެ އިއްތިފާގުން މި ބިލް ވަނީ ފާސްކޮށްފައެވެ.
މަޖިލީހުން މިއަދު ފާސްކުރި ބިލުގައި ރެވެނިއު ސްޓޭމްޕްގެ ނިޒާމު އުވާލައިގެން ދައުލަތުގެ އާމްދަނީއަށް ކުރާނެ އަސަރު ވެސް ހިމަނާފައިވެ އެވެ.
އެގޮތުން، ފާއިތުވި ދެ އަހަރަށް ބަލާއިރު، ސްޓޭމްޕް ވިއްކައިގެން 2019 ވަނަ އަހަރު ދައުލަތަށް 17.5 މިލިއަން ރުފިޔާ ލިބިފައިވެއެވެ. އަދި މިދިޔަ 2020 ވަނަ އަހަރު އެ އަދަދު އުޅެނީ 3.9 މިލިއަން ރުފިޔާގަ އެވެ. އަދި މިއަހަރު 3.7 މިލިއަން ރުފިޔާ ލިބޭނެ ކަމަށް ވަނީ އަންދާޒާ ކޮށްފައެވެ.
ސްޓޭމްޕް ޕްރިންޓުކުރަން 547،228 ރުފިޔާ ހޭދަވި އިރު، ގާނޫނު އުވާލާއިރު މިވަގުތު ޕްރިންޓްކޮށްފައިހުރި ސްޓޭމްޕްގެ އަދަދުތައް ވެސް އެ ބިލުގައި ހިމަނާފައިވެ އެވެ. އެގޮތުން، 10 ލާރީގެ ސްޓޭމްޕުން ފެށިގެން 10،000ރ. އާ ހަމައަށް ރާއްޖޭން ތަފާތު އަގުތަކުގެ ޖުމްލަ 13 ސްޓޭމްޕެއް ޕްރިންޓްކޮށްފައިވާއިރު، މިދިޔަ އަހަރުގެ ނޮވެމްބަރު މަހާ ހަމައަށް ގާތްގަނޑަކަށް 460،000 ސްޓެމްޕް ސްޓޮކުގައި އެބަހުއްޓެވެ.
އޭގެ ތެރެއިން މިވަގުތު އެންމެ ގިނައިން ޕްރިންކޮށްފައިހުރީ 100ރ. ގެ 111،641 ސްޓޭމްޕާއި އާއްމުކޮށް އެންމެ ގިނައިން ބޭނުންވާ 10ރ. ގެ 92،652 ސްޓޭމްޕެވެ.