އަންނަ ރިޔާސީ އިންތިހާބުގެ ކުރިން ބަރުލަމާނީ ނިޒާމަށް ވެރިކަމުގެ ނިޒާމު ބަދަލު ކުރަން ރައްޔިތުންގެ މަޖިލީހުގެ ތެރެއިން މަސައްކަތް ކުރައްވާނެ ކަމަށާއި އަދި އެކަން ކާމިޔާބު ކުރެއްވޭނެ ކަމަށް ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވެއްޖެ އެވެ.
ކްލަބު ހައުސް މެދުވެރިކޮށް އާއްމުންގެ ސުވާލު ތަކަށް ޖަވާބު ދެއްވަމުން ރައީސް ނަޝީދު މިރޭ ވިދާޅުވީ ބަރުލަމާނީ ނިޒާމަކަށް ދިއުމަށް ޕީޕީއެމް އިންވެސް ތާއީދު ކުރާނެ ކަމަށް ގަބޫލު ކުރައްވާ ކަމަށެވެ. އެމަނިކުފާނު ވިދާޅުވީ ބަރުލަމާނީ ނިޒާމަށް ތާއީދު ނުކުރާ ކަމަށް ޕީޕީއެމްވެސް ނުބުނާ ކަމަށާއި އެހެން ކަމުން ރައްޔިތުންގެ ފެންނަ ނުފެންނަ ވޯޓުން ބަރުލަމާނީއަށް ތާއީދު ލިބޭނެ ކަމަށެވެ.
"ރިޔާސީ ނިޒާމް އޮންނާނެ ކަމަށް ގަބޫލެއް ނުކުރަން. ރައީސް ޔާމިނާއެކު ޕީޕީއެމްއިން ތާއީދާއެކު ފެންނަ ނުފެންނަ ވޯޓަކަށް ދެވޭނެ،" ނަޝީދު ވިދާޅުވި އެވެ.
އެހެން ނަމަވެސް ނަޝީދު ވިދާޅުވީ ބަރުލަމާނީ ނިޒާމަށް ބަދަލު ނުވެ ރިޔާސީ އިންތިހާބަށް ގޮސްފި ނަމަ ރިޔާސީ އިންތިހާބުގެ އެމްޑީޕީ ޕްރައިމަރީގައި ބައިވެރިވަޑައިގަންވާނެ ކަމަށެވެ. އަދި ރިޔާސީ އިންތިހާބުގެ ޕްރައިމަރީ އެމަނިކުފާނު ކާމިޔާބު ކުރައްވާނެ ކަމަށް ވިދާޅުވި އެވެ.