ކުޑަ ކުއްޖަކާ ބެހުމުގެ ނިޔަތެއް އޭނާގެ ނެތްކަމަށާއި 15 އަހަރުގެ ކުއްޖާ ކައިިރި ދިއުމަށް ބުކިން ހައްދާ ފައިސާ ދެއްކީ "އޮއިލް މަސާޖެއް"ކޮށްލަން ދާންކަމަށް ފިނޭންސް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު އަޝްމަލީ ބުނެފި އެވެ.
ދިރާގުގެ ކުރީގެ ޗެއާމަން އަޝްމަލީގެ ފަރާތުން އޭނާގެ ފަރާތުން ކޯޓުގައި އޭނާގެ ދިފާއީ ވަކީލު މި މޭރުމުން ރައްދު ދިނީ އަންހެން ކުއްޖަކު ލައްވައި ހަށިވިއްކުމާއި އެ ކުއްޖާގެ ބޭނުން ނަހަމަ ގޮތުގައި ހިފި މައްސަލާގައި އަޝްމަލީ ހައްޔަރުކުރުމުން ކޯޓުގައި ދިން ރައްދުގައި އެވެ.
އަޝްމަލީގެ ބަންދުގެ މުއްދަތު އިތުރުކުރުމަށް ކޮލަމްބޯ ކޯޓަށް ހާޒިރުކުރުމުން އޭނާގެ ދިފާއީ ވަކީލު ވަނީ އޭނާ ބަންދުގައި ބަހައްޓަން ޖެހޭ ސަބަބެއް ނެތްކަމަށް ބުނެ ބައެއް ކަންކަން ފާހަަގަކޮށްފައި އެވެ. އެގޮތުން އޭއެފްޕީން ރިޕޯޓްކޮށްފައިވާ ގޮތުން އަޝްމަލީ ވަނީ އޭނާއަށް ކުރާ ތުހްމަތުތަކަށް އިންކާރުކޮށްފައި އެވެ. ވަކީލް ވިދާޅުވީ މަސާޖް ކޮށްލަން ދާން ބޫކްކޮށް އެތަނަށް ފައިސާ ދެއްކީ ވެބްސައިޓަކުން ފެނުން އިޝްތިހާރަކަށް ބަލައިގެންނެވެ.
އެހެން ނަމަވެސް އަޝްމަލީގެ ވާހަކަތަކަށްފަހުވެސް ކޯޓުން ވަނީ މި މަހުގެ 16 ވަނަ ދުވަހާހަމައަށް އޭނާ ބަންދުގައި ބަހައްޓަން އަމުރުކޮށްފައި އެވެ.
އަންހެން ކުއްޖަކު ލައްވާ ހަށިވިއްކުމާއި ބަޔަކު މީހުން ކުއްޖާ ބޭނުންކުރަމުންދިއުމުގެ ކުށުގައި އަޝްމަލީ ހައްޔަރުކުރީ މިދިޔަ އާދިއްތަ ދުވަހު އެވެ. އެ ދުވަހު އޭނާގެ އިތުރުން ތިން މީހަކު އެ މައްސަލައިގައި ހައްޔަރުކުރި އެވެ. އޭގެ ކުރިންވެސް ގިނަ ބަޔަކު ވަނީ ހައްޔަރުކޮަށްފައި އެވެ.