އެމެރިކާގެ ސިފައިން އަފްޣާނިސްތާނުގެ އެއާބޭސް ދޫކޮށް ފުރާފައިވަނީ އެންގުމަކާއި ނުލާ ސިއްރުން ދަންވަރުގެ ވަގުތުގައި ކަމަށް އެ އެއާބޭސްގެ އާ ކޮމާންޑަރު ބުނެފިއެވެ.
ޖެނެރަލް އަސަދުﷲ ކޮހިސްތާނީއާއި ހަވާލާދީ ބީބީސީއިން ރިޕޯޓްކޮށްފައިވާ ގޮތުގައި ބަގްރަމް ދޫކޮށް އެމެރިކާފެ ސިފައިން ގޮސްފައިވަނީ ހުކުރު ދުވަހުގެ ފަތިހު 3 ޖެހިއިރު ކަމަށާއި އެ މީހުންނަށް އެކަން އެނގިފައިވަނީ އޭގެ އެތައް ގަޑިއެއް ފަހުން ކަމަށެވެ.
ބަގްރަމްގައި އެމެރިކާ ސިފައިން ޖަލެއް ވެސް ހަދާފައިވާ ކަމަށާއި އެތަނުގައި 5000 އަށްވުރެ ގިން ތާލިބާނުން ތިބި ކަމަށް ވެސް އޭނާ ބުންޏެވެ. ޖެނެރަލް ކޮހިސްތާނީ ބުނެފައިވާ ގޮތުގައި އެމެރިކާ ސިފައިން އުއްމީދު ކޮށްގެން ތިބީ ތާލިބާނުން ބަގްރަމްއަށް ހަމަލާދޭނެ ކަމަށް ކަމަށެވެ.
އެމެރިކާއިން ހުކުރު ދުވަހު ވަނީ އެމެރިކާ ސިފައިން ބަގްރަމްގައި ކުރިޔަށް ގެންދިޔަ މިލިޓަރީ ކެމްޕެއިން ނިންމާލާފައިވާ އެތަން ދޫކޮށް ރައީސް ޖޯ ބައިޑެންގެ ވައުދާއި އެއްގޮތަށް އެ ގައުމުން ފައިބާފައިވާ ކަމަށް ބުނެފައެވެ.
ޖެނެރަލް ކޮހިސްތާނީ ބުނީ އެމެރިކާގެ ސިފައިން ދިޔައީ 3.5 މިލިއަން އައިޓަމްތައް ބަހައްޓާފައި ކަމަށެވެ. އޭގެ ތެރޭގައި އެތައް ހާސް ފެންފުޅިއާއި، އެނާޖީ ޑްރިންކްސް، މިލިޓަރީ ރެޑިމޭޑް ކާނާ ހިމެނޭ ކަމަށެވެ. އަދި މީގެ އިތުރުން އާދައިގެ އެެތައް ހާސް ދަޅުދަނޑިނެތް ވެހިކަލާއި، އެތައް ސަތޭކަ ހަނގުރާމަ މަތީ ވެހިކަލްވެސް ހުރި ކަމަށް އޭނާ ބުންޏެވެ.
ހުރިހާ ބަރު ހަތިޔާރެއް އެމެރިކާ ސިފައިން ދިޔައީ ހިފައިގެން ކަމަށާއި ބައެއް ލުއި ހަތިޔާރު ބަހައްޓާފައިވާ ކަމަށް ވެސް ކޮމާންޑަރު ބުނެފައިވެއެވެ.
ދަންވަރު ސިއްރުން އެއާބޭސް ދޫކުރުމާއި ބެހޭގޮތުން އެމެރިކާ ސިފައިން ބުނެފައިވަނީ އެކި ގޮތްގޮތުން އަފްޣާނިސްތާނުގެ ލީޑަރުންނާއި އެމީހުންވާނީ އެވާހަކަތައް ހިއްސާ ކޮށްފައި ކަމަށެވެ.