ހޮލީވުޑްގެ މަޝްހޫރު ފިިލްމް "ސުޕަމޭން" އަދި "ގޫނީސް"ގެ ޑިރެކްޓަރ ރިޗާޑް ޑޮނަރ މަރުވެއްޖެއެވެ.
91 އަހަރުގައި މިދިޔަ ހޯމަ ދުވަހު ރިޗާޑް މަރުވެފައިވާކަން އޭނާގެ އަނބިމީހާ ފިލްމް ޕްރޮޑިއުސަރ ލޯރެން ޝުލަރ ޑޮނަރ ވަނީ ހާމަ ކޮށްފައެވެ.
ރިޗާޑްގެ އެންމެ ފުރަތަމަ މަސައްކަތަކީ 1976 ވަނަ އަހަރު އުފެއްދި ފިލްމް"ދަ އޮމެން" އެވެ. އެއަށް ފަހު އޭނާ ވަނީ "ފްރީ ވިލީ" އަދި "ދަ ލޮސްޓް ބޯއީސް" ޕްރޮޑިއުސް ކޮށްފައެވެ.
"ދަ ގޫނީސް" ގެ ވާހަކަ ލިޔުނު ފަރާތް ކަމަށްވާ ސްޓީވެން ސްޕީލްބާގް ބުނެފައިވާ ގޮތުގައި ރިޗާޑްއަކީ ތަފާތު ހުނަރުތަކުން ފުރިފައިވާ މީހެކެވެ. އޭނާ އަކީ އެކުގައި މަޖާކޮށްލަން ނިކުންނަން ބަރާބަރު މީހެއް ކަމަށާއި، ކަންތަކަށް ހިތްވަރު ދިނުމުގައި ދެވަނައެއް ނެތް ފަދަ މީހެއް ކަމަށް ސްޕީލްބާގް ބުނެފައިވެއެވެ. އޭނާ މަރުވިކަން ގަބޫލު ކުރަން އަދިވެސް އުނދަގޫ ކަމަށް އޭނާ ބުންޏެވެ.
ނިއުޔޯކްގެ ބްރޯންޒްއަށް އުފަން ރިޗާޑް އޭނާގެ މަސައްކަތް ޓީވީގައި ފަށާފައިވަނީ 1960ގެ އަހަރު ތަކުގައެވެ. އެގޮތުން ފާހަގަ ކޮށްލެވޭ މަސައްކަތްތަކުގެ ތެރޭގައި "އެންތޮލޮޖީ ސީރީސް"، "ދަ ޓްވައިލައިޓް ޒޯން" އަދި ސްޕައި ތްރިލާއެއް ކަމަށްވާ "ދަ މޭން ފްރޮމް އަންކަލް" ހިމެނެއެވެ.
1970ގެ މެދު ތެރޭގައި އޭނާ ވަނީ ހޮލީވުޑްގައި މަސައްކަތް ކުރަން ފަށާފައެވެ. އެގޮތުން 1978ގައި "ސުޕަމޭން" އެންމެ ފުރަތަމަ ސުޕާހީރޯ ފިލްމްކަމަށް ބުނެވޭ ފިލްމްގެ މަސައްކަތް އޭނާ ކުރިއެވެ. އެއަށްފަހު 1985 ގައި "ދަ ގޫނީސް" ޕްރޮޑިއުސްކޮށް އަދި ޑައިރެކްޓް ކުރިއެެވެ.
ރިޗާޑް ޑޮނަރ ގެ ވަކިވުން ވެގެން ދިޔައީ ހޮލީވުޑަށް ލިބުނު ބޮޑު ހިތްދަތި ކަމަކަށެވެ. ގިނަ ބަޔަކު ދަނީ ސޯޝަލް މީޑިއާގައި އޭނާގެ އާއިލާއަށް ތައުޒިޔާ ކިޔަމުންނެވެ،