ޖިންސީ ގޯނާގެ މައްސަލަތަކެއްގައި ދައުވާ އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރުގައި ބަހައްޓައިގެން ޝަރީއަތް ކުރިއަށް ގެންދިއުމަށް ކްރިމިނަލް ކޯޓުން ނިންމި ނިންމުން ޕްރޮސިކިއުޓަރ ޖެނެރަލް (ޕީޖީ) އޮފީހުން ހައިކޯޓުގައި އިސްތިއުނާފުކުރި މައްސަލައިގެ ޝަރީއަތުގެ އަޑުއެހުން މިއަދު ކެންސަލްކޮށްފި އެވެ.
މި އަޑުއެހުން ބާއްްވަން ތާވަލުކޮށްފައި އޮތީ މިއަދު މެންދުރުފަހު 15.15 އަށެވެ. ނަމަވެސް ދިމާވި އިދާރީ މައްސަލައަކާ ގުޅިގެން އަޑުއެހުން މިއަދު ވަނީ ކެންސަލްކޮށްފައި އެވެ.
އަލީ ވަހީދުގެ މައްސަލަައިގައި ކްރިމިނަލް ކޯޓުން އަލީ ވަހީދު ރާއްޖެއިން ބޭރުގައި ބަހައްޓައިގައި އޮންލައިންކޮށް ޝަރީއަތް ކުރިއަށް ގެންދިއުމަށް ނިންމާފައިވާ މައްސަލަ ހައިކޯޓުގައި އިސްތިއުނާފު ކޮށްފައިވަނީ ޖޫން 25 ވަނަ ދުވަހުއެވެ.
އަލީ ވަހީދު ރާއްްޖެއިން ބޭރުގައި ހުންނަވަނިކޮށް ޝަރީއަތުގައި ބައިވެރިވުމަށް ފުރުސަތު ދީފައިވަނީ ކްރިމިނަލް ކޯޓުގެ އިސްޤާޟީ އަޙްމަދު ޝަކީލުގެ ލަފާގެ މަތިން އެ މައްސަލަ ބައްލަވާ ޤާޟީ ޙަސަން ސަޢީދު ކަަމަށް ޕީޖީ އޮފީހުން ބުނެފައިވެ އެވެ. ނަމަވެސް، ޤާނޫނުގައި ވަކި ގޮތަކަށް އޮތް ކަމެއްގައި، އަދި އެކަމާބެހޭ ގޮތުން ސުޕްރީމް ކޯޓުން ވަކި ގޮތެއް ނިންމަވާފައި އޮތް ކަމެއްގައި، އެނޫން ގޮތަކަށް ލަފާ ދެއްވުމަކީ، އިސްޤާޟީ އަޙްމަދު ޝަކީލަށް ކުރެއްވޭނެ ކަމެއް ނޫން ކަމަށް ޕީޖީ އޮފީހުން ވިދާޅުވެ އެެވެ.