28 މީހުންނާއެކު ދަތުރު ކުރަމުން ދަނިކޮށް ވެއްޓުނު ރަޝިއާގެ މަތިންދާ ބޯޓުގެ ބައިތަކެއް ފެނިއްޖެއެވެ.
މި ބޯޓުގެ ބައިތަކެއް ކަމްޗަޓްކާ ޕެނިންސުލާގެ އައްސޭރިފަށުގެ އެއްގަމުންނާއި ކަނޑުންވަނީ ފެނިފައެވެ. އެހެން ނަމަވެސް އަދި މިހާތަނަށް މި ބޯޓުގައި ދަތުރު ކުރި އެއްވެސް މީހަކު ފެނިފައެއް ނުވެއެވެ.
"އެންޓޮނޯވް އެން-26 ޓްވިން އެންޖިންޑް ޓާބޯޕްރޮޕް" މި މަތިންދާ ބޯޓަކީ 1982 ވަނަ އަހަރުން ފެށިގެން ދަތުރުތަކުގައި ބޭނުންކުރަމުން އައިސްފައިވާ ބޯޓެކެވެ. އެ ބޯޓު ޕެޓްރޮޕެވްލޮސްކް-ކަމްޗަޓްސްކީ އިން ޕެލެނާ އަށް ދަތުރު ކުރަމުން ދަނިކޮށް އުތުރު ކަމްޗަޓްކާ ހިސާބުން އެއަރ ޓްރެފިކް ކޮންޓްރޯލްއާއި ގުޅުން ކެނޑި ބޯޓު ވީނުވީއެއް ނޭނގިފައިވާ ކަމަށް ރަޝިއާގެ އިމަޖެންސީ މިނިސްޓްރީއިން ބުނެއެވެ.
މި ބޯޓުގައި 22 ޕެސެންޖަރުންނާއި 6 ކްރޫން ދަތުރުކޮށްފައިވެއެވެ. އޭގެ ތެރޭގައި 2014 ވަނަ އަހަރު އުފަންވީ ކުޑަކުއްޖަކު ވެސް ހިމެނެއެވެ. ބޯޓު ހޯދުމުގެ މަސައްކަތަށް ސާޗް އެންޑް ރެސްކިއު ޓީމުން ނިކުމެ ބޯޓު ހޯދުމުގެ މަސައްކަތް ފެށި ކަމަށް ޓްރާންސްޕޯޓް ޕްރޮސެކިއުޓަރ އޮފީހުގެ ތަރުޖަމާނު ވެލެންޓީނާ ގްލެޒާވޯ ވަނީ ބުނެފައެވެ. އޭނާ ބުނެފައިވާ ގޮތުގައި ބެލެވެނީ ބޯޓުގެ މުވާސަލާތީ ޚިދުމަތަށް ބުރޫ އެރުމުގެ ސަބަބުން ރަންވޭ އަކަށް ނުޖެއްސުނީ ކަމަށެވެ.
އޮފިޝަލުން ބުނެފައިވާ ގޮތުގައި ބޯޓާއި ގުޅުން ކެނޑިފައިވަނީ ޕެލަނާ އެއާޕޯޓާއި 9 ކިލޯމީޓަރުން ދުރުންކަމަށެވެ. އެއީ ބޯޑު ޖެއްސުމަށް ޝެޑިއުލް ކުރެވިފައި އޮތް ގަޑީގެ 10 މިނިޓް ކުރިންނެވެ.
އިމަޖެންސީގައި ހަރަކާތްތެރިވާ ފަރާތްތަކުން ދަނީ އެ ސަރަހައްދަށް ދިޔުމަށް ދަތުރު ފަށާފައެވެ، އެހެން ނަމަވެސް އެ ސަރަހައްދަކީ ކަނޑުމަގުން ދާންޖެހޭ ސަރަހައްދަކަށް ވެފައި އެ ސަރަހައްދު އޮންނަ ގޮތުން އެތަނުގައި ހަރަކާތްތެރިވުމަށް ވަރަށް އުނދަގޫތަކާއި ކުރިމަތިލާން ޖެހޭނެ ކަމަށް އޮފިޝަލުން ބުނެއެވެ.
މި ބޯޓުގައި ދަތުރުކުރި ފަސިންޖަރުންގެ ތެރޭގައި ޕެލަނާގެ ލޯކަލް އެޑްމިނިސްޓްރޭޝަންގެ ވެރިޔާ އޮލްގާ މޮޚިރެވާ ވެސް ހިމެނޭ ކަމަށް ރިޕޯޓްތައް ބުނެއެވެ.