ސަލްމާން ހާންގެ ކުރިއަށް ހުރި ފިލްމްތަކުގެ ތެރެއިން އެންމެ އަވަހަށް ރިލީޒް ވާން ހަމަޖެހިފައިވާ "ޖެއި ހޯ" ގެ ޑިޖިޓަލް ޕޯސްޓަރު މިއަދު ލޯންޗްކޮށްފި އެވެ.
އަންނަ މަހުގެ 24 ގައި ރިލީޒް ކުރާ މި ފިލްމްގެ ފުރަތަމަ ޓްރެއިލާ މި މަހުގެ 12 ވަނަ ދުވަހު އާންމު ކުރާނެ އެވެ.
ސަލްމާންގެ ކޮއްކޮ ސުހައިލް ހާން ޕްރޮޑިއުސްކޮށް، ޑައިރެކްޓް ކުރާ "ޖެއި ހޯ" ގެ އިތުރު ތަރިންގެ ތެރޭގައި ބޮލީވުޑަށް އަލަށް ތައާރަފްވާ ސަނާ ހާން އާއި ޑެއިޒީ ޝާހްގެ އިތުރުން ތާބޫ އާއި އަޝްމިތު ޕަޓޭލް ހިމެނެ އެވެ.
އަދި މި ފިލްމްގެ ހާއްސަ ރޯލަކަށް ދާދި ފަހުން ބްރޫނާ އަބްދުﷲ ވެސް ވަނީ ސޮއިކޮށްފަ އެވެ. ރިޕޯޓްތައް ބުނާ ގޮތުން ބުރޫނާ ފެނިގެން ދާނީ އަޝްމިތުގެ ލޯބިވެރިޔާގެ ގޮތުގަ އެވެ.
ހިޓަކަށް ފަހު ހިޓެެއް "100 ކްރޯޑް" ގެ ރެކޯޑްތަކަކާ އެކު ގެނެސް ދެމުން އަންނަ ސަލްމާންގެ އެއްވެސް ފިލްމެއް މި އަހަރު ރިލީޒެއް ނުވެ އެވެ.
އެހެންވެ 2014 ގެ ފުރަތަމަ މަހުގެ ތެރޭގައި ސަލްމާންގެ ފިލްމެއް ބެލުންތެރިންނާ ހަމައަށް އަންނަން ހަމަޖެހިފައި އޮތުމަކީ އޭނާގެ ފޭނުންނަށް ލިބިިފައިވާ ވަރަށް ބޮޑު ހިތްހަމަޖެހުމެކެވެ.
ކުރިން "މެންޓަލް" ގެ ނަމުގައި މަސައްކަތް ފެށި "ޖެއި ހޯ" އަކީ ތެލެގޫ ފިލްމް "ސްޓާލިން" ގެ ރިމެކިންއެކެވެ. އެކަމަކު ފަހުން ފިލްމްގެ ނަން ބަދަލު ކުރީ ސަލްމާންގެ ބައްޕަ އަދި ސްކްރީން ރައިޓަރު ސާލިމް ހާން އެކަމަށް ރެކޮމަންޑް ކުރުމުންނެވެ.
މި ފިލްމުގައި ސަލްމާން ފެނިގެންދާނީ އަސްކަރީ އޮފިސަރެއްގެ ގޮތުގަ އެވެ.