ހެއިޓީގެ ރައީސް ޖޮވެނެލް މޮއިސް ބުދަ ދުވަހު އަވަހާރަކޮށްލައިފިއެވެ.
ބަޑިޖަހާ އޭނާގެ ގެކޮޅުގައި ހުންނަވަނިކޮށް މޮއިސް އަވަހާރަކޮށްލާފައިވާ ކަމަށް އިންޓަރިމް ޕްރައިމް މިނިސްޓަރ ކްލައުޑީ ޖޯސެފް ވަނީ ޔަގީން ކޮށްދެއްވާފައެވެ.
މޮއިސްގެ ގެކޮޅުން ވެސް ވަނީ މި ހަމަލާއާއި ގުޅިގެން ބަޔާނެއް ނެރުއްވާފައެވެ. އެގޮތުން ބުދަދުވަހު ފަތި 1 ޖަހާއެކާހަންއިރު ބަޑިޖަހާ މޮއިސް އަވަހާރަ ކޮށްލާފައިވާ ކަމަށާއި އަދި އަނބިކަނބަލުން މާޓީން މޮއިސްވެސް ޒަހަމްވި ކަމަށާއި އޭނާއަށް ހޮސްޕިޓަލުގައި ފަރުވާ ދެމުންދާ ކަމަށް އެސޯސިއޭޓެޑް ޕްރެސްއިން ރިޕޯޓު ކޮށްފައިވެއެވެ.
ދެހާސް ސަތާރަވަނަ އަހަރު ވެރިކަމަށް ވަޑައިގެންނެވި މޮއިސްއާ ދެކޮޅަށް 2018 ވަނަ އަހަރުން ފެށިގެން އެކި ފަހަރު މަތިން އެގައުމުގައި މުޒާހަރާތައް ވަނީ ބާއްވާފައެވެ މޮއިސްއާ ދެކޮޅަށް އެ މުޒާހަރާތައް ފެށީ ތެލުގެ ސަބްސިޑީތައް އުވާލުމުން، ތެލުގެ އަގު ވަރަށް ބޮޑަށް އުފުލުމުގެ ސަބަބުން ރައްޔިތުން ހިތްހަމަނުޖެހިގެންނެވެ. އަދި މި ހިނގާ 2021 ވަނަ އަހަރުގެ ފެބްރުއަރީ މަހުވެސް މޮއިސްއާ ދެކޮޅަށް ބޮޑެތި މުޒާހަރާތައް ބާއްވާފައިވެ އެވެ.
ހެއިޓީގެ އިދިކޮޅު ފަރާތްތަކުން ބުނާ ގޮތުގައި މިދިޔަ ފެބްރުއަރީ މަހުގެ ހަތެއްގައި މޮއިސްގެ ފަސް އަހަރުގެ ދައުރު ވަނީ ހަމަވެފައެެވެ. އެހެން ކަމުން މިހާތު ރައީސްކަމުގައި އޭނާ ހުންނަން ނުޖެހޭ ކަމަށް މުޒާހަރާ ކުރި ފަރާތްތަކުން ވަނީ ބުނެ އަޑުއުފުލާފައެވެ. ފެބްރުއަރީމަހުގެ 7 ވަނަ ދުވަސް އެއީ މޮއިސްގެ ކުރިން ރައީސްގެ ގޮތުގައި ހުންނެވި މިޝެލް މާޓެލީ އިސްތިއުފާ ދެއްވި ދުވަހަށް ފަސް އަހަރު ފުރޭ ދުވަހެވެ.
މި ވާހަކަތަކަށް ޖަވާބުދާރީ ވުމުގެ ގޮތުން މޮއިސް ވިދާޅުވި ގޮތުގައި އޭނާ ވެރިކަމާ ހަވާލުވެވަޑައިގެންނެވީ މާޓެލީ އިސްތިއުފާ ދެއްވިތާ އެއް އަހަރު ފަހުން ކަމުން، އޭނާއަށް ވެރިކަމުގެ އިތުރު އަހަރެއް ލިބޭނެ އެވެ. މީގެ އިތުރުން މިދިޔަ ފެބްރުއަރީ މަހު މޮއިސް ވަނީ އޭނާ އަވަހާރަކޮށްލަން ބަޔަކު މަސައްކަތް ކުރި ކަމަށާއި، އޭނާގެ ސެކިއުރިޓީން އެ ރޭވުން ނާކާމިޔާބު ކޮށްލި ކަމަށް ވިދާޅުވެފަ އެވެ.