ހިތަދޫ “ނިދާ” ކިޔާ ގޭގެ ކޮޓަރިތެރެއަށް ފާރެއްވެއްޓި ގެއްލުންތަކެއްވުމުގެ ސަބަބުން އެމްއެންޑީއެފް ސަދަން އޭރިއާގެ ސިފައިންގެ އެހީތެރިކަން ފޯރުކޮށްދީފި އެވެ.
މިއަދު ހެނދުނު ހިނގި މިޙާދިސާގައި "ނިދާ" ގޭގެ ކޮޓަރިތެރެއަށް ފާރު ވެއްޓުމުގެ ސަބަބުން އެގޭގެ ފުރާޅުން ބައެއްވެސް ވަނީ ކޮޓަރިތެރެއަށް ވެއްޓިފައެވެ. މިޙާދިސާގައި މީހަކަށް ގެއްްލުމެއް ނުލިބުނު ނަމަވެސް އެކޮޓަރީގައި ހުރި ބޭނުންކުރާ ސާމާނަށް ވަނީ އެކިވަރުގެ ގެއްލުން ލިބިފައެވެ.
މިޙާދިސާގެ ރިޕޯޓް އެމްއެންޑީއެފް ސަދަން އޭރިއާގެ ހެޑްކްއޯޓަރޒްއަށް މިއަދު 11:45 ހާއިރު ލިބުމުން، އެމްއެންޑީއެފް ސަދަން އޭރިއާގެ ޓީމެއް އެގެއަށް ގޮސް އެހީތެރިވުމުގެ މަސައްކަތް ވަނީ ވަގުތުން ފަށާފަ އެވެ.
މިގޮތުން ފާރު ވެއްޓުމުގެ ސަބަބުން ކޮޓަރިތެރެއަށް އެޅިފައިވާ ގައު ކުނޑިތައް ނަގައި ކޮޓަރި ސާފުކުރުމުގެ މަސައްކަތް ވަނީ ކޮށްފައެވެ. އަދި ވެއްޓުނު ފުރާޅު ނަގައި ފާރުން ނުވެއްޓި ހުރިބައި ލިބިދާނެ ގެއްލުމަކަށް ބަލައި ގޭގެ ވެރިފަރާތުގެ އެދުމުގެމަތިން ފާރު ވައްޓާލުމުގެ މަސައްކަތްވެސް ވަނީ ކޮށްފައެވެ.