އިރާގުގައި ހުންނަ އެމެރިކާގެ އެމްބަސީއަށް ރޮކެޓް ހަމަލާތަކެއް ދީފިއެވެ.
ފާއިތުވި 24 ގަޑިއިރު ތެރޭގައި އިރާގު އަދި ސީރިއާގައި ހަރަކާތްތެރިވާ އެމެރިކާގެ ސިފައިންނާއި ޑިޕްލޮމެޓުންނަށް އަމާޒުކޮށް ޑްރޯން ހަމަލާތަކަކާއެކު 3 ރޮކެޓް ހަމަލާވަނީ ދީފައެވެ.
އެމެރިކާއަދި އިރާގުގެ އޮފިޝަލުން ބުނީ ބުދަ ދުވަހު އެކަނި ވެސް 14 ވަރަކަށް ރޮކެޓް ހަމަލާ އެމެރިކާ ސިފައިން ބަލަހައްޓާ އިރާގުގެ އެއާބޭސް ވަނީ ދީފައެވެ. އެ ހަމަލާތަކުގައި އެމެރިކާގެ ދެ މީހަކު ވަނީ ޒަޚަމްވެފައެވެ.
މިހާތަނަށް މި ހަމަލާތަކުގެ ޒިންމާ އެއްވެސް ފަރާތުން އުފުލާފައެއް ނުވެއެވެ. އެހެން ނަމަވެސް ބެލެވެނީ ސީރިއާއަދި އިރާގުގައި ހަރަކާތްތެރިވާ އެމެރިކާ މީހުންނަށް ހަމަލާދެނީ އިރާނުގެ ހަތިޔާރުއެޅި ގްރޫޕްތަކުން ކަމަށް އޮފިޝަލުން ބުނެއެވެ.
އެމެރިކާއިން އިރާގުގައި އެމީހުންގެ 2500 އެއްހާ ސިފައިން ބައިނަލްއަޤްވާމީ އައިއެސްއައިއެސް ގްރޫޕްތަކާއި ދެކޮޅަށް ހަނގުރާމަ ކުރާ މީހުންގެ ގޮތުގައި ހަރަކާތްތެރިވެއެވެ. އެމެރިކާގެ އެ ސިފައިންނަށް އަމާޒުކޮށް މިއަހަރު މިހާތަނަށް 50 ވަރަކަށް ހަމަލާވަނީ ދެވިފައެވެ، އެހެން ނަމަވެސް ފާއިތުވި ދުވަސްކޮޅު ހަމަލާތައް ވަނީ އިތުރުވެފައެވެ.
އިރާގްގެ ހަތިޔާރުއެޅި ގްރޫޕްތަކުން ވަނީ އިރާންއާއިއެކު އެމެރިކާގެ ސިފައިން އިރާގުން ބޭލުމަށް ވައުދުވެފައެވެ. މި ވައުދު ވެފައިވަނީ އެމެރިކާގެ ސިފައިން އިރާޤްއާއި ސީރިއާގެ ބޯޑަރު ކައިރީގައި ހިންގި އޮޕަރޭޝަނެއްގައި މި ގްރޫޕްތަކަށް ނިސްބަތްވާ 4 މީހަކު މި ދިޔަ މަހު މަރާލުމާއި ގުޅިގެންނެވެ.