ހިތަދޫ ކޮންވެންޝަން ސެންޓަރ ނުވަތަ އީސީސީ އަޅާނުލާ ދޫކޮށްލާފައިވާތާ އެތައް ދުވަހެއްވީއެވެ. އެކަމާއި އަޅާލާނެ ފަރާތެއް މިވީހާ ހިސާބަށް ފެނިފައި ނުވެއެވެ.
17 ވަނަ ސާކް ސަމިޓަށް ދައުލަތުގެ ބަޖެޓް "ބަންޑުން" ކޮށްގެން ހެދި އިމާރާތް ވީރާނާ ވަމުންދާ ވާހަކަ އެތައް ބަޔަކު ދައްކައިފިއެވެ. އެތަނުގެ ހާލަތުގެ ވާހަކަ ރާއްޖޭގެ އެކި މީޑިއާތަކުން އެތައް ފަހަރަކު ކިޔައިފިއެވެ. ތަނުގެ އެތެރޭގައި ހުރި ފަރުނީޗަރ ފަދަ ތަކެތީގައި ކަތުރު ފަނި އެޅި ވާހަކައެވެ.
ފުރިހަމަ ލޭޑްސްކޭޕިން ހެދި ތަންތަން ބޯ ޖަންގައްޔަށްވެ އިމާރާތް ގެއްލެމުންދާ ވާހަކައެވެ. ކޮންވެންޝަން ސެންޓަރު ވަށައިގެންވާ ސަރަހައްދުވެސް ވިރާނާވާ ވާހަކައެވެ.
އަންނަ ޖެނުއަރީ މަހުގެ 18 ވަނަ ދުވަހު ލޯކަލް ކައުންސިލް އިންތިހާބް ބާއްވާކަމަށް އިއްލާން ކޮށްފައިވަނިކޮށް ކުއްލި ގޮތަކަށް އީސީސީ ސަރަހައްދު ސާފުކޮށް ރީތި ކުރަމުންދާ މަންޒަރު އެބަފެނެއެވެ. އެހިސާބުގަނޑު ޕޭވްމަންޓް މަތީ އޮތް ބޮޑެތި ވިނަގަނޑުތައް ސާފުކޮށް އީސީސީގެ މައި ދެދޮރޯށި ސަރަހައްދު މުޅިން ކަހަލަ ގޮތަކަށް ވަނީ ސާފްކޮށްފައެވެ. އަދި މަޑުމަޑުން މިހާރު އީސީސީގެ އަސްލު ކުލަ ފެންނަމުން އެބަދެއެވެ.
ސާކް ސަމިޓަށްފަހު އީސީސީ ބެލެހެއްޓުމާއި ގުޅޭގޮތުން ކައުންސިލުން އަބަދުވެސް ދައްކާ އެއްވާހަކަ އެއް އޮވެއެވެ. އެއީ އެއިމާރާތަކީ ހައުސިން މިނިސްޓްރީގެ ބެލުމުގެ ދަށުގައި ހުރި ތަނެއް ކަމަށެވެ، އެހެންވެ އެތަން ވީރާނާވަމުންދާތީ ކައުންސިލުން "ކަންބޮޑުވާ" ވާހަކައެވެ. ކައުންސިލްގެ ބެލުމުގެ ދަށުގައި ނެތުމުން އެތަން ނުބެލެހެއްްޓެނީ ކަމަށެވެ.
އީސީސީ ވީރާނާވާން ކައުންސިލުން ދޫކޮށްލާފައިވާ މައްސަލާގައި އައްޑޫ ރައްޔިތުންގެ ނުރުހުން ކައުންސިލަަށް އޮތީ ވަރަށް ބޮޑަށް ލިބިފައެވެ. ފަހުގެ ތާރީހެއްގައި އައްޑޫއަށް ލިބުނު ބިނާ ބޭނުމެއް ނުކުރެވި ހަލާކުވާން ދޫކޮށްލެވިފައި އޮތުމަކީ ކައުންސިލް ފެއިލްވެފައި އޮތުމުގެ ރަމްޒެކެވެ. އެކަން ރާއްޖޭގެ އެންމެންވެސް ގަބޫލްކުރެއެވެ.
ކައުންސިލްގެ ބަޖެޓްނެތިގެން ފޯނު ބިލު ކަނޑާލައި ކަރަންޓް ކަނޑާލާނެ ކަމުގެ ބިރު އޮތް ދުވަސްވަރެއްގައި ކުއްލި ގޮތަކަށް އީސީސީ ސަރަހައްދު ސާފުކުރުމުން ކައުންސިލް އިންތިހާބާއި މިކަމާއި ހުރި ގުޅުން އެބަ ހާމަވެއެވެ. ކައުންސިލުން ވަގުތީ ގޮތަށް ނަގާފައިވާ މުވައްޒަފުން ތަކެއް ބޭނުންކޮށްގެން އީސީސީ ސަރަހައްދު ސާފުކުރަން އުޅުމުން އެކަން ވަމުންދާ މަންޒަރު މިހިރީ ފެންނާށެވެ. އަދި މިކަމަކީ ބޮޑު މަސައްކަތެއް ކަމަށް ބުނެ އަތް އުރާލައިގެން އޮތް ކައުންސިލަށް މިކަން ކުރެވިދާނެކަން މިއޮތީ ފެންނާށެވެ.
ކައުންސިލުން ކޮންމެ ކަމެއް ވެސް މި ކުރަނީ އެމީހުންގެ ގޮޑީގެ ބޭނުމުގައެވެ. މިއޮތްހާ ދުވަހު އަޅާ ނުލާ ދޫކޮށްލާފައި އޮތް އީސީސީ ސަރަހައްދު "މެކުހަށް" ޖަހާ ސާފު ކުރަނީއެވެ. އެ ސަރަހައްދުން ދައްލަތުގެ ބޭނުމަށް ކަމަށް ބުނެ ރައްޔިތުން އަތުން ނިގުޅައިގަތް ބިން އަލުން ދޭން ގުރުއަތުލުމަށް އިއްލާން ކުރީއެވެ. ފޭދޫ ހައުސިން ޔުނިޓް ތަކުގެ ގުރުލުންވެސް ބާއްވަން ތާވަލް ކުރީއެވެ. ރެއާއި ދުވާލު މިހާރު މަސައްކަތް ކުރަނީ އަންނަ ދައުރުގެ ގޮޑި ހޯދުމަށެވެ. އަދިވެސް އިތުރު އާ އެތައް ކަމެއް ފެންނާނެއެވެ. ބަލަމާ ހިނގާ