ބަނގްލަދޭޝްއިން ފާއިތުވި 24 ގަޑިއިރުތެރޭ ކޮވިޑް ޖެހިގެން 201މީހުން މަރުވެއްޖެއެވެ.
މި އަދަދަކީ ފާއިތު އަހަރު މާޗްމަހުގައި އެ ގައުމުން ކޮވިޑް ފެނުނު ފަހުން މިހާތަނަށް ވެސް އެއް ދުވަހެއްގައި މިހާ ގިނަމީހުން މަރުވި ފުރަތަމަ ފަހަރެވެ. މިހާތަނަށް 165 މިލިއަން މީހުންގެ އާބާދީއެއް އޮތް މި ގައުމުގައި ކޮވިޑް ޖެހިގެން 15،593 މީހުން ވަނީ މަރުވެފައެވެ.
ދެވަނައަށް އެންމެ ގިނަ މީހުން މަރުވެފައިވަނީ މިދިޔަ ހޯމަ ދުވަހުއެވެ. އެއީ 164 މީހުންނެވެ. ޖުލައި މަހުގެ ފުރަތަމަ ހަފްތާގައި ބަނގްލަދޭޝްއިން 1090 މީހުން ވަނީ މަރުވެފައެވެ. މިއީ ކޮވިޑްގައި ހަފްތާއެއްގެ ތެރޭގައި އެންމެ ގިނަ މީހުން މަރުވި ހަފްތާ ވެސް މެއެވެ.
ފާއިތުވި 24 ގަޑިއިރު ތެރޭގައި ބަނގްލަދޭޝްއިން ވަނީ 11،162 އާ ކޭސް ފެނިފައެވެ. އެކޭސް ތަކާއެކު ބުދަ ދުވަހުގެ ނިޔަލަށް އެ ގައުމުން ކޮވިޑަށް ޕޮޒިޓިވް ވި މީހުންގެ ޖުމްލަ އަދަދު ވަނީ 9،77،568 އަށް އަރާފައެވެ.
ކޮވިޑްގެ ހާލަތު ގޯސްވެ މީހުން މަރުވާ ރޭޓް އިތުރު ވުމާއި ގުޅިގެން ބަނގްލަދޭޝްގެ ސަރުކާރުން ވަނީ ހަރުކަށި ފިޔަވަޅު ތަކަކާއެކު ހޯމަ ދުވަހުން ފެށިގެން ހަފްތާއެއްގެ މުއްދަތަށް އެޤައުމު ލޮކްޑައުން ކޮށްފައެވެ.
އިންޑިއާއިން ފެނިގެންދިޔަ ކޮވިޑްގެ ޑެލްޓާ ވޭރިއަންޓް ބަނގްލަދޭޝްއިން ވެސް ވަނީ ފެނިފައެވެ. ކޭސްތައް އިތުރުވެފައިވަނީ މި ވޭރިއަންޓްގެ ސަބަބުން ކަމަށް އޮފިޝަލުން ބުނެއެވެ. އަދި މިހާލަތުގައި އެގައުމުން އޮކްސިޖަން ހުސްވުމުގެ ބިރުވެސް ވަނީ ހީވެފައެވެ.