މެއި 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދެވުނު ހަމަލާއާ ގުޅިގެން ޝައްކުކުރެވޭ މާލީ މުއާމަލާތެއް ފާހަގަކުރެވިފައިނުވާ ކަމަށް ހަމަލާއާ ގުޅިގެން 241 ކޮމިޓީން ކުރިޔަށް ގެންދިޔަ އިންކުއަރީ ރިޕޯޓުން ބުނެފިއެވެ.
އިންކުއަރީ ރިޕޯޓްގައި ބުނެފައިވާ ގޮތުގައި އިންކުއަރީން އެމްއެމްއޭ އާއި އެމްއެމްއޭގެ އެފްއައިޔޫއިން މިކަމާއި ގުޅޭގޮތުން ސާފުކުރި މައުލޫމާތަށް ބަލާއިރު، އެދުވަސްވަރު ޓެރަރިޒަމް އާ ގުޅުންހުރި ޝައްކުކުރެވޭ ޓްރާންސެކްޝަނެއް ހިނގާފައިވާކަން ފާހަގަކުރެވިފައިނުވާ ކަމަށް އެމްއެމްއޭގެ އެފްއައިޔޫއިން ބުނެފައެވެ.
ޓެރަރިޒަމް އަށް ޚަރަދުކޮށް ފައިސާގެ މުއާމަލާތްތައް ހިންގަނީ މުޅިއަކުން ރަސްމީ މާލީ ނިޒާމުގެ ތެރެއިން ނޫންކަމަށާއި ބޭންކިން ސިސްޓަމުގެ ބޭރުން ނަގުދު ފައިސާއިން ވެސް މިފަދަ މުއާމަލާތްތައް ހިންގާ ކަމަށް އިންކުއަރީ ރިޕޯޓްގައި ބުނެފައިވެއެވެ. އަދި ރަސްމީ ބޭންކިންގ ނިޒާމުގެ ބޭރުން ފައިނޭންޝަލް ނެޓްވޯރކް ބޭނުންކުރާނެކަމުގެ އިހުތިމާލު ބޮޑުކަން އިންކުއަރީއަށް ލިބުނު މައުލޫމާތުން ފާހަގަކުރެވޭކަމަށް ވަނީ ބުނެފައެވެ.
ސަލާމަތީ ޚިދުމަތްތަކުން ހާމަކޮށްފައިވާ ގޮތުގައި ރައީސް ނަޝީދަށް މިހަމަލާދީފައިވަނީ ހަރުކަށި ފިކުރުގެ މީހުންނެވެ. އެހަމަލާއާ ގުޅިގެން މިހާތަނަށް ހައްޔަރުކޮށްފައިވަނީ ހަރުކަށި ފިކުރަށް ތާއީދުކުރާ މީހުން ކަމަށް ވެސް ސަލާމަތީ ޚިދުމަތްތަކުން ބުނެއެވެ. ހަމަލާ ދިނުމުގެ ބޭނުމާއި ޚަރަދުކުރި ފަރާތެއް މިއިންކުއަރީ ރިޕޯޓް ނެރުމާ ހަމައަށް ފުލުހުންނަށް ދެނެގަނެވިފައިނުވާ ކަމަށް ވަނީ ރިޕޯޓްގައި ބުނެފައެވެ.