ހެއިޓީގެ ރައީސް ޖޮވެނެލް މޮއިސް އަވަހާރަ ކޮށްލި ކަމަށް ޝައްކު ކުރެވޭ 6 މީހަކު އެ ޤައުމުގެ ފުލުހުން ބެލުމުގެ ދަށަށް ގެންގޮސްފިއެވެ.
ރައީސް މޮއިން އަވާހާރަ ކޮށްލާ އަނބިކަނބަލުން ޒަޚަމް ކޮށްލި ކަމަށް ބެލެވޭ މީހުންގެ ތެރެއިން މީގެ ކުރިން ފުލުހުން ވަނީ 4 މީހަކު މަރާލާފައެވެ. އަދި މި ފަހަރު 6 މީހަކު ފުލުހުންގެ ބެލުމުގެ ދަށަށް ގެންދިޔަކަން ޕޮލިސް ޗީފް ލިއޯން ޗާލްސް ވަނީ ޔަގީންކޮށްދީފައެވެ.
ހެއިޓީގެ އެކްޓިންގ ޕްރައިމް މިނިސްޓަރ ކްލައުޑީ ޖޯސެޕް ވަނީ ރައީސް އަވަހާރަ ކޮށްލުމުގައި ހިމެނޭ ފަރާތްތައް ހޯދުމަށް އާންމުގެ އެހީތެރިކަމަށް އެދިފައެވެ. އެންމެން އެކަތިގަނޑަކަށް ވެގެން އެ މީހުން ހޯދާ ޝަރީޢަތުގެ ކުރިމައްޗަށް ގެނައުމަށް މަސައްކަތް ކުރުމަށް އޭނާ ވަނީ އެދިވަޑައިގެންފައެވެ.
ދެހާސް ސަތާރަވަނަ އަހަރު ވެރިކަމަށް ވަޑައިގެންނެވި މޮއިސްއާ ދެކޮޅަށް 2018 ވަނަ އަހަރުން ފެށިގެން އެކި ފަހަރު މަތިން އެގައުމުގައި މުޒާހަރާތައް ވަނީ ބާއްވާފައެވެ މޮއިސްއާ ދެކޮޅަށް އެ މުޒާހަރާތައް ފެށީ ތެލުގެ ސަބްސިޑީތައް އުވާލުމުން، ތެލުގެ އަގު ވަރަށް ބޮޑަށް އުފުލުމުގެ ސަބަބުން ރައްޔިތުން ހިތްހަމަނުޖެހިގެންނެވެ. އަދި މި ހިނގާ 2021 ވަނަ އަހަރުގެ ފެބްރުއަރީ މަހުވެސް މޮއިސްއާ ދެކޮޅަށް ބޮޑެތި މުޒާހަރާތައް ބާއްވާފައިވެ އެވެ.
ހެއިޓީގެ އިދިކޮޅު ފަރާތްތަކުން ބުނާ ގޮތުގައި މިދިޔަ ފެބްރުއަރީ މަހުގެ ހަތެއްގައި މޮއިސްގެ ފަސް އަހަރުގެ ދައުރު ވަނީ ހަމަވެފައެެވެ. އެހެން ކަމުން މިހާތު ރައީސްކަމުގައި އޭނާ ހުންނަން ނުޖެހޭ ކަމަށް މުޒާހަރާ ކުރި ފަރާތްތަކުން ވަނީ ބުނެ އަޑުއުފުލާފައެވެ. ފެބްރުއަރީމަހުގެ 7 ވަނަ ދުވަސް އެއީ މޮއިސްގެ ކުރިން ރައީސްގެ ގޮތުގައި ހުންނެވި މިޝެލް މާޓެލީ އިސްތިއުފާ ދެއްވި ދުވަހަށް ފަސް އަހަރު ފުރޭ ދުވަހެވެ.
މި ވާހަކަތަކަށް ޖަވާބުދާރީ ވުމުގެ ގޮތުން މޮއިސް ވިދާޅުވި ގޮތުގައި އޭނާ ވެރިކަމާ ހަވާލުވެވަޑައިގެންނެވީ މާޓެލީ އިސްތިއުފާ ދެއްވިތާ އެއް އަހަރު ފަހުން ކަމުން، އޭނާއަށް ވެރިކަމުގެ އިތުރު އަހަރެއް ލިބޭނެ އެވެ. މީގެ އިތުރުން މިދިޔަ ފެބްރުއަރީ މަހު މޮއިސް ވަނީ އޭނާ އަވަހާރަކޮށްލަން ބަޔަކު މަސައްކަތް ކުރި ކަމަށާއި، އޭނާގެ ސެކިއުރިޓީން އެ ރޭވުން ނާކާމިޔާބު ކޮށްލި ކަމަށް ވިދާޅުވެފަ އެވެ.