ބަންގްލަދޭޝްގެ ކާބޯތަކެތި އުފައްދާ ފެކްޓްރީއެއްގައި ނުރައްކާތެރި އަލިފާނުގެ ހާދިސާއެއް ހިނގާ 52 މީހުން މަރުވެއްޖެއެވެ.
ގިނަ އަދަދެއްގެ ބަޔަކު ފެކްޓްރީގެ މަތީ ފަންގިފިލާތަކުގައި ތާށިވެ ދުމުގެ ސަބަބުން މަރުވެފައިވާ ކަމަށް ޕޮލިސް އޮފިޝަލުންނާއި ހަވާލާދީ އެ ޤައުމުގެ ނޫސްތަކުން ރިޕޯޓްކޮށްފައިވެއެވެ.
މި ހާދިސާ ހިނގާފައިވަނީ ވެރިރަށް ޑާކާގެ އިރުމަތިން 25 ކިލޯމީޓަރު ދުރުގައި އޮންނަ ރުޕްގަންޖްގެ ފެކްޓްރީއެއްގައެވެ. ބުރާސްފަތި ދުވަހުގެ މެންދުރުގެ ވަގުތެއްގައި ރޯވި އަލިފާންގަނޑު 24 ގަޑިއިރު ވެގެން ދިޔައިރު ވެސް އަދިވެސް ދަނީ އަނދަމުންނެވެ.
"އަލިފާން ކޮންޓްރޯލް ކުރެވުނީމަ މީހުން ސަލާމަތް ކުރުމުގެ އޮޕަރޭޝަނެއް އަޅުގަނޑުމެން ޖައްސާނަން. އޭރުން މަރުވި މީހުންނާއި ޒަޚަމްވީ މީހުން އަސްލު އަދަދު އެނގިގެންދާނީ" އަލިފާން ނިއްވުމާއިބެހޭ އިސްވެރިޔާ ދޭބަޝިޝް ބަރްދަން ބުންޏެވެ.
މިހާތަނަށް 30 ވަރަކަށް މީހުން ވަނީ ބޮޑެތި ޒަޚަމްތަކާއެކު ސަލާމަތް ކުރެވިފައެވެ.
ފެކްޓްރީގެ ތެރޭގައި ތާށިވެފައިތިބި މީހުންގެ އަދަދު އަދި އެނގިފައެއް ނުވެއެވެ. ފެކްޓްރީގައި މަސައްކަތް ކުރާ ފަރާތްތަކުގެ އާއިލާގެ މީހުން ވަނީ ފެކްޓްރީގެ ކައިރިއަށް އެއްވެފައެވެ. ކޮންމެ މީހަކު ވެސް އުއްމީދު ކުރަމުން ދަނީ އެމީހުންގެ އާއިލީ މީހުން ދިރި ތިއްބާ ފެންނާނެ ކަމަށެވެ.