ސްވިޑެންގެ މަތިންދާ ބޯޓެއް ވެއްޓި އެއިން ދަތުރުކުރި 9 މީހުން މަރުވެއްޖެއެވެ.
ވެއްޓުނު ބޯޓަކީ ސްކައިޑައިވަރުން ގޮވައިގެން ދަތުރު ކުރި ބޯޓެކެވެ. އެ ބޯޓުން މަަރުވި 9 މީހުންގެ ތެރޭގައި ޕައިލެޓް ވެސް ހިމެނެއެވެ.
ޑީއެޗް-2 ބީވާ މަރުކާގެ މި ކުޑަ ބޯޑު ކުއްޔަށް ހިފައިގެން ދަތުރު ކުރީ ސްކައިޑައިވިންގ ކްލަބެއްގެ ބަޔަކު އެމީހުންގެ އިވެންޓެއް ޖެއްސުމަށް ކަމަށް މައުލޫމާތު ލިބެއެވެ.
މި ބޯޓު ވެއްޓިފައިވަނީ މައްޗަށް މައްޗަށް އަރަން ފެށިތަނުން ކަމަށް ކަމާއިބެހޭ ފަރާތްތަކުން ބުނެއެވެ. މި ހާދިސާގައި މަރުވި ފަރާތްތަކުގެ އާއިލާތަކަށް ސްވިޑެންގެ ޕްރައިމް މިނިސްޓަރ ސްޓެފަން ލޮފްވެން ވަނީ ތައުޒިޔާ ފޮނުވާފައެވެ.
2019 ވަނަ އަހަރު ވެސް މި ކަހަލަ ހާދިސާއެއް ވަނީ ހިނގާފައެވެ. އެ ފަހަރު ވެއްޓުނީ ޕެރެޝޫޓް ޖަމްޕް ކުރުމަށް ދަތުރުކުރި ބަޔަކު ދިޔަ ބޯޓެކެވެ. އެ ފަހަރު ވެސް އެބޯޓުން ދަތުރުކުރި އެންމެން ވަނީ މަރުވެފައެވެ. ފަހުން އެ ހާދިސާގެ ތަހުގީގުން އެނގިފައިވާ ގޮތުގައި އެ ހާދިސާ ހިނގުމަށް ދިމާވީ ބޯޓަށް ލޯޑު ކުރުމުގައި ހެދިފައިހުރި ގޯސްތަކެއްގެ ސަބަބުން ކަމަށެވެ.