ތަޖިކިސްތާނަށް އައި ބިންހެލުމެއްގައި 5 މީހުން މަރުވެ އެތައް ސަތޭކަ ގެއަކަށް ގެއްލުންވެއްޖެއެވެ.
5.9 މެގްނިޓިއުޑްގެ ބިންހެލުން އައިސްފައިވަނީ ހޮނިހިރު ދުވަހުގެ ހެނދުނުގެ ވަގުތެއްގައި ތަޖިކިސްތާނުގެ އިރުމަތީ ރަޝްތު ޑިސްޑްރިކްޓަށް ކަމަށް އެގައުމުން ހާމަކުރެއެވެ.
ބިންހެލުމުގެ އަސަރު 165 ކިލޯމީޓަރު ދުރަށް ވެސް ފެތުރިގެން ދިޔަކަމަށް ރިޕޯޓްތައް ބުނެއެވެ. އިމްޖެންސީގައި ހަރަކާތްތެރިވާ އެ ގައުމުގެ ކޮމިޓީއިން ބުނެފައިވާ ގޮތުގައި ގިނަ އަދަދެއްގެ ގެތައް ވަނީ ނުއުޅެވޭ ވަރަށް ހަލާކުވެފައެވެ. ކަރަންޓު ކޭބަލްތައް ވެސް ބައެއް ސަރަހައްދު ތަކުގައި ހަލާކުވެފައިވާ ކަމަށް އެ ކޮމިޓީއިން ބުނެއެވެ.
މި ބިންހެލުން އެ ގައުމަށް އައިސްފައިވަނީ ހެނދުނު 7:14 ގައި 10 ކިލޯމީޓަރު އަޑިން ކަމަށް އެ ގައުމުގެ ޚަބަރު ފަތުރާ ވަސީލަތްތަކުން ރިޕޯޓް ކުރެއެވެ. ތަޖިކިސްތާންގެ ރައީސް އިމޯމަލީ ރަކްމޮންޑް ވަނީ ޕްރައިމް މިނިސްޓަރު އިސްކޮށް ހުންނަވައިގެން އިންކުއަރީ ކޮމިޝަނެއް ހެދުމަށް އަންގާފައި ކަމަށް ރަޝިއާގެ މީޑިއާތަކުން ރިޕޯޓް ކުރެއެވެ.