ރަޝިއާގައި ކޮވިޑް ޖެހިގެން ފާއިތުވި 24 ގަޑިއިރު ތެރޭގައި ރެކޯޑް އަދަދަކަށް މީހުން މަރުވެއްޖެއެވެ.
ކޮވިޑްގެ ތިންވަނަ ރާޅަކާއި ހަނގުރާމަ ކުރަމުން އަންނަ ރަޝިއާގައި ފާއިތުވި 24 ގަޑިއިރު ތެރޭގައި ކޮވިޑް ޖެހިގެން މަރުވި މީހުންގެ އަދަދު ވަނީ 752 އަށް އަރާފައެވެ. ރަޝިއާގައި ޑެލްޓާ ވޭރިއަންޓް ފެތުރެން ފެށުމާއިއެކު ފާއިތުވި 12 ވަރަކަށް ދުވަސް ވެފައިވަނީ މި ބަލީގައި މަރުވާ މީހުން އިތުރުވެފައިވާ ދުވަސް ތަކަކަށެވެ.
ހޮނިހިރު ދުވަހު މި ގައުމުގައި ކޮވިޑަށް މިހާތަނަށް ޕޮޒިޓިވް ވީ މީހުންގެ އަދަދު ވަނީ 5.75މިލިއަނަށް އަރާފައެވެ. އެ އަދަދާއެކު މިހާރު ރަޝިއާވަނީ 5 ވަނައަށް އެންމެ ގިނަ މީހުން ޕޮޒިޓިވްވީ ގައުމަށް ވެފައެވެ.
18.9 މިލިއަން އަބާދީއެެއް އޮންނަ ރަޝިއާގައި މިހާތަނަށް 146 މިލިއަން މީހުންނަށް ވަނީ ވެކްސިން ޖަހާފައެވެ. ދާދިފަހުން އެ ގައުމުގައި ނެގުނު މައުލޫމާތުން އެނގިފައިވާ ގޮތުގައި ރަޝިއާގެ 54 އިންސައްތަ މީހުން ވެކްސިން ޖަހާކަށް އަދި ބޭނުމެއް ނުވެއެވެ.
ރަޝިއާގައި ވެކްސިން ޖަހާފައިވަނީ 16 އިންސައްތަ މީހުންނެވެ. މިއީ ތަރައްޤީ ވެފައިވާ ޤައުމަކަށް ބަލާއިރު ވަރަށް ދަށް އިންސައްތައެކެވެ. ވެކްސިން ޖެހުމުން މި ގައުމު މިވަނީ އެހެނިހެން މިފަދަ ޤައުމުތަކާއި އަޅާބަލާއިރު ވަރަށް ފަހަތުގައި ކަމަށް ދިރާސާ ކުރާ ފަރާތްތަކުން ބުނެއެވެ.
ސަރުކާރުން ދަނީ ވެކްސިން ޖެހުމަށްޓަކައި ކުރެވެން ހުރި ހުރިހާ މަސައްކަތެއް ކުރަމުން ކަމަށާއި އެހެން ނަމަވެސް ރަޝިއާގެ ރައްޔިތުންނަކީ ވަރަށް އަޑުނާހާ ގޮތްދޫނުކުރާ ބަޔަކު ކަމަށް ސިއްހީ އޮފިޝަލަކު ވަނީ ބުނެފައެވެ.