ޕަރިނީތީ ޗޯޕްޅާ އާއި ސިދާތު މަލްއުތުރާ ލީޑް ރޯލް ކުޅެފައިވާ "ހަސީ ތޯ ޕަސީ" އަންނަ ފެބްރުއަރީ މަހުގެ ހަތެއްގައި ރިލީޒް ކުރާ ގޮތަށް ނިންމައި ފިލްމްގެ ފުރަތަމަ ޓްރެއިލާ މިއަދު އާންމުކޮށްފި އެވެ.
މިއީ ކަރަން ޖޯހަރުގެ "ސްޓޫޑަންޓް އޮފް ދި އިޔާ" އިން 2012 ވަނަ އަހަރު ބޮލީވުޑަށް ތައާރަފްވި ސިދާތުގެ ދެވަނަ ފިލްމެވެ.
މި ފިލްމް ވެސް ޕްރޮޑިއުސްކޮށްފައި ވަނީ ކަރަންގެ ދަރްމާ ޕްރޮޑަކްޝަނުންނެވެ. އެކަމަކު އަނޫރާގް ކޭޝަޕްގެ ފޭންޓަމް ފިލްމްސް އާ ގުޅިގެންނެވެ.
ހެއްވާ މަޖާ ހާދިސާތަކެއްގެ މައްޗަށް ބިނާކޮށް އުފައްދާފައިވާ ލޯބީގެ ފިލްމް "ހަސީ ތޯ ޕަސީ" ގެ މުހިއްމު ރޯލަކުން އަދާ ޝަރްމާ ވެސް ފެނިގެން ދާނެ އެވެ.
އަދާއަކީ 2010 ވަނަ އަހަރު ވިކްރަމް ބަޓްގެ ބިރުވެރި ފިލްމް "1920" އިން ބޮލީވުޑަށް ތައާރަފްވި ބަތަލާއެކެވެ. އެހެން ނަމަވެސް މިހާތަނަށް އޭނާ މާ ގިނަ ފިލްމްތަކަކުން ފެނިގެން ގޮސްފައެއް ނުވެ އެވެ.
"ހަސީ ތޯ ޕަސީ" ޑައިރެކްޓްކޮށްފައި ވަނީ ޑައިރެކްޓަރުގެ ގޮނޑީގައި ފުރަތަމަ ފަހަރަށް އިށީން ވިނިލް މެތިއު އެވެ.