އެމްޑީޕީން ހޯދައިދޭން ބުނި އިންސާފުގެ ރަހަ ނަޝީދަށް ވެސް ހިތި

އެމްޑީޕީން ހޯދައިދޭން ބުނި އިންސާފުގެ ރަހަ ނަޝީދަށް ވެސް ހިތި ކަމަށް ކުރީގެ ޑިފެންސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.

އާދަމް ޝަރީފް މިހެން ވިދާޅުވެފައިވަނީ އެ ބޭފުޅާ ކުރެއްވި ޓްވީޓެއްގައެވެ.

"ރައީސް ނަޝީދަށް ޓެރަރިސްޓް ހަމަލާއެއް ދީ، ފުރާނަ އަށް ނުރައްްކާވުމުން އެ މަނިކުފާނުގެ ސެކިއުރިޓީ ވަރުގަދަކޮށް ރައްކާތެރިކަން ކަށަވަރު ކުރުމުގެ ބަދަލުގައި ސަރުކާރުން ރައީސް ނަޝީދު "ހަވަރަށް" ދިނީތޯ؟ ނޫނީ "ފެނު ކައްކާ ބޮލީގެ އިއްޒަތް ދެއްވީތޯ؟ އެމްޑީޕީ އިން ހޯދައިދޭން ބުނި އިންސާފުގެ ރަހަ ރައީސް ނަޝީދަށް ވެސް ހިތި." އާދަމް ޝަރީފް ވިދާޅުވިއެވެ.

އެމްޑީޕީގެ ތެރޭގައި ވަނީ ވަރަށް ބޮޑަށް ބައިބައިވުން އުފެދިފައެވެ. އެމްޑީޕީގެ ބައެއް މީހުން ހިތްހަމަނުޖެހުނަސް ކުރާނެ ކަމެއް ނެތް ކަމަށާއި ކުރީގެ ރައީސް އަބްދުﷲ ޔާމީން އާއި ޕީޕީއެމް އިން މެދުމިނުގެ ދީނީ ސިޔާސަތަށް ތާއީދުކުރާނަމަ އެ ފަރާތްތަކުގެ އެހީއަށް އެދޭނެ ކަމަށްވެސް ނަޝީދު ވަނީ ވިދާޅުވެފައިވެއެވެ.

ނަޝީދު މިހެން ވިދާޅުވެފައިމިވަނީ އެމްޑީޕީގެ އެތެރޭގައި ބޮޑެތި ބައިބައިވުންތަކެއް އުފެދިފައިވާ ދަނޑިވަޅެއްގައެވެ. އެގޮތުން ނަޝީދު މަސައްކަތް ކުރައްވަމުން ގެންދަވަނީ ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރަން ކަމަށްވާއިރު އެކަމާއި އެމްޑީޕީގެ ބައެއް މަޖިލިސް މެމްބަރުން އަންނަނީ ދެކޮޅު ހަދަމުންނެވެ.

އެމްޑީޕީ އޮތީ ދެ ބަޔަކަށް ބެހިފައި ކަމަށް ގިނަ ބަޔަކު ބުނެއެވެ. އެއީ ރައީސް ނަޝީދަށް ތާއީދު ކުރާ ފަރާތްތަކާއި ރައީސް އިބްރާހީމް މުހައްމަދު ސޯލިހަށް ތާއީދު ކުރާ ފަރާތްތަކެވެ.

އެމްޑީޕީގެ އެތެރޭގައި މިވަގުތު ދިމާވެފައިވާ މައްސަލައަކީ ރިޔާސީ ޓިކެޓްގެ މައްސަލައެއް ކަމަށް ޕީޕީއެމް ޕީއެންސީ ކޯލިޝަން ހިންގެވުމާ ހަވާލުވެވަޑައިގެން ހުންނެވި އަބްދުއްރަހީމް އަބްދުﷲ ވަނީ ވިދާޅުވެފައެވެ.

އެމްޑީޕީގެ އެތެރޭގެ ހަމަނުޖެހުން ބޮޑުވެ ރައީސް މުހައްމަދު ނަޝީދަށް ތާއީދު ކުރައްވާ ފަރާތްތަކާއި ރައީސް އިބްރާހިމް މުހައްމަދު ސޯލިހަށް ތާއީދުކުރާ ފަރާތްތަކުގެ މެދުގައި ބަހުގެ ހަމަލާތައް އަންނަނީ ބަދަލުކުރެވެމުންނެވެ. އަދި އަންނަ ރިޔާސީ އިންތިހާބުގެ ޓިކެޓް ކާމިޔާބު ކުރައްވާނޭ ކަމަށް ރައީސް މުހައްމަދު ނަޝީދުވެސް ވަނީ ވިދާޅުވެފައެވެ.