އައްޑޫގެ އެކި ރަށްރަށުގައި، މިހާރު ކައުންސިލުން ޤާއިމުކޮށްފައިވާ ޑިޕާޓްމަންޓްތަކުގެ ބަދަލުގައި، އަވަށު އޮފީސްތައް ހަދާ ގޮތަށް ނިންމައިފި އެވެ.
ކައުންސިލުން ބުނީ ޖެނުއަރީ 1، 2014 އިން ފެށިގެން ރަށްރަށުގައި ހިނގަމުންދާނީ އަވަށު އޮފިސްތައް ކަމަށެވެ.
ކައުންސިލުން މި ގޮތަށް ނިންމަވާފައި ވަނީ، 2014 ވަނަ އަހަރު ކައުންސިލްގެ އިދާރާގެ ހިންގުމުގެ އޮނިގަނޑަށް ގެންނަވަން ގަސްދު ކުރައްވާ ބަދަލުތައް ގެންނެވުމަށް ބޭއްވެވި ކައުންސިލްގެ ބައްދަލުވުމުގައި މެމްބަރުން ވާހަކަ ދައްކަވާ މަޝްވަރާކުރައްވާ ހެއްދެވުމަށްފަހުގަ އެވެ.
މި ބަދަލުތައް ގެންނަކަން ހާމަކޮށް މި މަހުގެ 5 ގައި ކައުންސިލުން ވަނީ ސަރކިއުލާއެއްް ވެސް ނެރެފަ އެވެ.
ކައުންސިލްގެ އިދާރީ ހިންގުމަށް ގެންނަވާ ބަދަލުތަކުގައި، ކުރިން ކައުންސިލުން ރަށްރަށުގައި ޤާއިމުކޮށްފައިވާ ޑިޕާޓްމަންޓްތަކުގެ ބަދަލުގައި ކޮންމެ ރަށެއްގައި ވެސް ރައްޔިތުންނަށް ޚިދުމަތް ދިނުމަށް ގާއިމުވެފައި ހުންނާނީ އަވަށު އޮފީހެވެ.
އެގޮތުން ހިތަދޫގައި ހުރި ޓްރާންސްޕޯޓް އެންޑް އިންފްރާސްޓްރަކްޗަ ބަދަލުވެގެން ދާނީ ހިތަދޫ އަވަށު އޮފީހަށެވެ. އަދި މަރަދޫގައި ހުރި ސޯޝަލް ޑިޕާޓްމަންޓް ބަދަލު ވާނީ އަވަށު އޮފީހަށެވެ. މަރަދޫފޭދޫގައި ހުރި ސޯޝަލް ޑިޕާޓްމަންޓްގެ ޖެނެރަލް ސާވިސް ސެކްޝަން ބަދަު ވާނީ މަރަދޫފޭދޫ އަވަށު އޮފީހަށެވެ. ފޭދޫގައި ހުރި ޔޫތު އެންޑް ބިޒްނަސް ޑިޕާޓްމަންޓް ބަދަލު ވާނީ ފޭދޫ އަވަށު އޮފީހަށެވެ.
މީގެ އިތުތުން މީދޫގައި ހުރި އެންވަޔަރަމަންޓް ޑިޕާޓްމަންޓް ބަދަލު ވާނީ މީދޫ އަވަށު އޮފީހަށެވެ. އަދި ހުޅުދޫގައި ހުރި އެންވަޔަރަމަންޓް ޑިޕާޓްމަންޓްގެ ޖެނެރަލް ސާވިސް ސެކްޝަން ބަދަލު ވާނީ ހުޅުދޫ އަވަށު އޮފީހަށެވެ.
މި ބަދަލުތައް ގެންނަން ނިންމީ ރައްޔިތުންނަށް ފަސޭހަކަމާއި އަވަސްކަމާއެކީ، ޚިދުމަތް ފޯރުކޮށް ދިނުމަށް ކަމަށް އައްޑޫ ސިޓީ ކައުންސިލުން ބުނެ އެވެ.